《愛回家之開心速遞》昨晚播出第633集「女婿是人家的好」，故事講崔Auntie（盧宛茵）特別返港為剛剛離婚的長女徵婚，這個囡囡是龍鳳胎，弟弟是阿傑（李嘉飾），由於家族遺傳到光頭的基因，所以崔Auntie選女婿都要求頭髮濃密，她一眼就睇中熊家兩姊妹的男友潮偉（袁文傑飾）和龔燁（張景淳飾），更呃兩人參加電視的真人騷較勁。
李嘉在劇中演崔Auntie的囝囝阿傑，仲有個孖生家姐。（圖片：《愛回家之開心速遞》電視截圖）
熊家兩個女兒的男朋友都被崔Auntie睇中。（圖片：《愛回家之開心速遞》電視截圖）
兩個男朋友因足球而立場不同，更要爭成為熊家最佳女婿。（圖片：《愛回家之開心速遞》電視截圖）
最終崔Auntie為囡囡求的姻緣信物玉珮，不小心落在熊家屋企的看更昌仔（陳勉良飾）手上，囡囡跟昌仔果然因為玉珮而一見鍾情，不過囡囡係邊個？咪就係搵李嘉反串男扮女裝。見李嘉戴上假髮，一身健碩的身型穿上紅白兩色的連身裙，粗壯的小腿腳踏白色高跟鞋，一出場實在令觀眾噴飯。李嘉接受《晴報》電話訪問，他表示：「真係第一次演女人，仲要唔係扮女人，係真係演個同自己一樣樣嘅女人，對我嚟講係從影以來非常大嘅挑戰。平時都有接觸女性，但當你真係要演個真女性，就體會到做女人相當唔容易，著高踭鞋著到我腳趾損晒，著絲襪又焗，我連戴胸圍都有困難，因為我隻手好難向後拗。」現時不在香港的李嘉表示沒有收看琴晚一集，但家人睇完他的造型，都大感震撼，他說：「化個妝都比平時耐好多，所以平時等女人化妝咁耐，原來有原因。最開心係有把長頭髮，我終於可以撥頭髮喇！」
不少網友對於他們的感情線非常期待，好希望可以發展落去，李嘉說：「要扮女人唔需要衝破關口，每個男人都有女性嘅一面，女人都有男性化嘅一面，冇問題呀！不過劇本就暫時冇寫到，連我同我媽咪崔Auntie都暫時未有，不過如果觀眾鍾意，公司又覺得可以，我一定會努力去做。」
嘩，李嘉一出，誰與爭鋒？（圖片：《愛回家之開心速遞》電視截圖）
李嘉化妝時都被路過的男同事狂望。（圖片：受訪者提供）
化晒妝又好長頭髮咁款。（圖片：受訪者提供）
畀埋全身你睇先！Ｗell....佢夠膽咁樣樣周圍走？（圖片：受訪者提供）
嘩！長腿呀！(圖片：受訪者提供)
呢對高踭鞋令佢受到唔少苦頭。(圖片：受訪者提供)
點知遇到保安昌仔，兩個人一見如故。（圖片：《愛回家之開心速遞》電視截圖）
呢個心心，仲唔係要發展感情線？（圖片：《愛回家之開心速遞》電視截圖）
另外，不少網友睇劇集《包青天再起風雲》後都留言指李嘉比張振朗更適合演展昭一角，李嘉說：「多謝觀眾支持，但我實在唔夠靚仔，展昭要靚仔，我知道振朗負傷去演呢個角色，所以刻意去呈現另一種風味嘅展昭。我自己演王朝，或者以往每一個角色都係好享受，希望演出可以樂在其中。」
唔好話唔益你，送多兩張早安圖你睇！（圖片：受訪者提供）
靚女，你手臂好強壯呀！（圖片：受訪者提供）