兒子答錯問題驚到口震震 惡媽車上打罵：返去打你10下

小朋友是一張白紙，十分需要家長耐心地循循善誘。但有網民日前搭港鐵回家時目擊心痛一幕，只見一名男童答錯問題，無法分清「隻」和「對」這兩個量詞後，便被其母當眾不停打罵，並聲言回家後要「10下咁打」。由於挺身而出勸阻仍不果，網民感到十分擔心：「你小朋友無辜，唔好逼死佢！」

媽媽恐嚇兒子回家再打10下

該名網民向Facebook群組「生仔要考牌系列」投稿，指自己日前在調景嶺站月台等車時，看到一名年約30多歲的媽媽，正在大聲斥責就讀小一、小二左右的兒子，「係咁重複話：『聽唔到，大聲啲！』個小朋友已經好驚。答完，個呀媽又再話：『大聲啲！』一直重複直到有車。」上車後，該名媽媽繼續大聲指罵兒子，並重複提問：

「對！我問你咩！點解係對！隻呀！隻呀！對咩呀！5個人有幾多！10！10咩呀！我問你隻！你點解答對！10！10吖嘛！我返去就打你10下！」

如是者，該名媽媽足足問了4個站相同的問題，而其子則間歇地回答「5」、「10」、「隻」、「對」之類，

「好驚好驚咁，個呀媽反覆咁再問對定隻，然後係咁話返去打佢，話：『十吖嘛，我返去就十下咁打！』」

{{hket:inline-image name="mtr290720191.jpg"}}{{/hket:inline-image}}

媽媽不理勸告當眾打仔

樓主續指，當時車上其他乘客無人出聲，「我當刻好怕一出聲，個媽媽會覺得係個小朋友搞到佢畀人望、畀人話，而返到家打得個小朋友更勁」。但到落車時，該名媽媽再恐嚇兒子「一陣就打」，樓主於是忍唔住勸對方：「太太，唔好咁惡鬧個小朋友啦，佢真係好驚。」惟對方未有理會，繼續向兒子重複剛才的提問。

由於擔心小朋友出事，樓主於是向職員求助，並致電其他已有子女的朋友詢問應如何處理的意見，

「未幾，個媽媽突然好大聲，大聲到我電話入面嘅朋友都聽到，個媽媽啪一聲打個小朋友，好大力咁又打又鬧。我即刻收線去睇咩事，打多幾下之後，佢由角落張櫈行去中間多人嘅位再鬧。」

樓主：好擔心小朋友有事

該名媽媽出閘後，樓主於是決定離開。未料對方突然行返轉頭衝去客戶服務處，激動地指著他：「佢跟住我！佢跟我返屋企、佢跟我返屋企、佢跟我返屋企呀！我要報警，報警呀！」樓主向職員說明事件後，亦表示：「佢話要報警，我都想報警佢打小朋友。」

其後，職員接手處理事件並作出調解。樓主最後在文末表示：

「我其實真係好擔心小朋友有事，而家好多小朋友有情緒病而自殺，呢位媽媽，如果你自己有病，麻煩你去睇醫生，但係你小朋友無辜，唔好逼死佢，我希望個小朋友無事。」

網民：好明顯阿媽情緒有問題

此事引來網民熱議，不少人認為該名媽媽不應如此教導小朋友，「不愉快經驗真係好影響成長」、「個小朋友大咗有童年陰影……係街都俾阿媽又打又鬧，唔敢想像係屋企點」、「逼個仔做咩，逼到大家都唔開心」、「EQ唔好就不要生，苦了下一代」。另有網民認為，該名媽媽的情緒或已出現問題，「好明顯阿媽情緒有問題，其他屋企人要幫忙」、「個呀媽有情緒病，太緊張，家人若見此post 勸下佢或同佢睇下心理醫生。」