黃澤鋒與52歲太太陳麗麗年初公布成功造人，至早前太太剖腹誕女，囡囡似足爸爸，多頭髮，重六磅，暫未改名，乳名為「小黃妃」，英文名為Miracle（奇蹟）。
▲B女乳名為「小黃妃」~（黃澤鋒Facebook）
不過生產過程非常驚險，雖然選擇咗剖腹降低高齡產婦生B危險性，但仍出現嚴重問題。
（黃澤鋒Facebook）
澤鋒受訪時一度哽咽：「幸福唔係必然，原本好開心入產房，係想睇住囡囡出世，太太最初半身麻醉，但因腳腫，後來血壓仲升得好高暈咗，要轉全身麻醉，醫生突然請我出手術室，當時我好驚，等咗半個鐘，好難過，唔知點算！我只係希望兩個人入去，三個人出番嚟，平平安安！」雖然夫婦二人都想再生，但黃澤鋒唔想愛妻搵命博。
（黃澤鋒Facebook）
瞓兩晚ICU仲想再生
陳麗麗生產時血壓飆升至200mnHg，有中風可能，去到妊娠毒血爆發臨界點，唯一方法是等小朋友出世，幸好最後大步檻過，澤鋒話：「真係冇諗過，佢哋出嚟嗰晚，我好難過。囡囡同太太送咗上去ICU，瞓咗兩晚，醫生同我講話唔使擔心，話太太血壓會慢慢降番，佢哋母女平安，我於願足矣！」
使十幾萬唔肉赤
今次太太剖腹生女又住ICU，共使咗十幾萬元：「錢冇所謂㗎！銀紙使得到先係銀紙，人在天堂，錢在銀行，我都仲畀得起，咪再努力工作搵過囉！」
（黃澤鋒Facebook）
愛女之情溢於言表
今日黃澤鋒首度現身分享喜悅，提起10日大愛囡笑到見牙唔見眼：「佢日日都唔同樣，每日都有影低佢，依家啲細路真係好叻，已經覺得佢識聽人話，叫佢唔好喊就真係唔喊！（習慣爸爸身份？）好鍾意、Enjoy呢個身份，呢個年紀5條嘢先做爸爸都好開心，三人行嘈啲、好玩啲，之後諗住教定佢歷史，由夏、商、周開始講起！」
（黃澤鋒Facebook）
獨門湊B法
澤鋒坦言雖然現時湊B好辛苦，但一切都值得：「頭3個月係辛苦啲，我朝早會教游水同打拳，夜晚就會湊囡囡，搞到自己都瘦咗2、3公斤，依家太太餵人奶，我就做阿四幫手拎尿片，最叻沖補充奶粉。」隨即分享獨有湊B方法，就是開大電視：「放BB喺隔籬聽聲，佢老竇我係做電視出身，點都要畀佢睇電視、聽電影，等佢接受。」
（黃澤鋒Facebook）
離開屋企唔過一個鐘
澤鋒表示太太身體恢復得唔錯，話佢情緒冇乜大變化，有男人肯幫手佢就冇事：「佢夠奶餵BB，但開刀嘅傷口會痛，我都叫佢休息多啲。反而我覺得自己賀爾蒙有變，所有事都變得好擔憂就算係教游水中間有9個字時間都會返屋企睇個囡。」
太太全職湊女
問到太太辛苦生B有咩獎勵？澤鋒大笑話：「我個戶口已經喺佢手，連提款密碼都冇，如果有情緒都就下佢，佢揸住你個Queen喎，我可以惡得去邊？」並透露太太之後會全職湊女，自覺年紀跟「小黃妃」有差距，希望爭取相處時間。講到太太曾表示再想生B，澤鋒話目前只想太太身體盡快恢復：「同佢去覆診醫生檢查佢個子宮都話佢可以再生，但今次生B過程好驚險，所以一切容後再算。」