王綺琴經歷過腦瘤的打擊，人生觀都大大改變，幸好她天生有一種獨有的思考方法，每每有事情發生，她都總想到最壞打算，當事情有好轉的情況，她就當作是額外的賞賜，與其說她是天生的悲觀代言人，倒不如形容她把「阿Q精神」發揮到極致。
綺琴在1986年參選《電視小姐》，當時勇奪冠軍後加入無綫，拍攝過《大運河》的「紅拂女」，一炮而紅，大受歡迎。當年綺琴參選，全因自己的好奇心，她說：「我係貪新鮮嘅人，年輕時只要打一份工之後失去剌激同新鮮感，我就會離職，所以每份工都做唔超過3個月。直至我喺當年嘅宋城打工做售貨員，有個表演領班邀請我幫忙客串跳舞演出，我當時膽粗粗就去試，就成為職業舞者，喺一個跳舞比賽入面，我得到獎品係藝員訓練班課程，當時同學仲有郭晉安。」
綺琴的演藝事業經歷過高山低谷，但她樂觀面對。(《晴報》圖片)
綺琴（右一）因際遇的關係而學識跳舞。（圖片：受訪者提供）
原來郭晉安同綺琴是訓練班同學仔。(圖片：郭晉安IG )
綺琴跳舞比賽得過獎，加入藝員訓練班。（圖片：受訪者提供）
綺琴1986年選「電視小姐」獲得冠軍。（圖片：受訪者提供）
跳舞表演的經驗，再加上訓練班的課程，綺琴信心滿滿參加「電視小姐」，從此踏上演藝的青雲路。綺琴說：「其實我出道嗰個年代真係好幸運，出嚟無耐就演到幾好嘅角色，個勢頭都好好，演完第一部戲之後，我直情感覺成個娛樂圈都係屬於我，自信心爆棚，非常自滿，連周潤發都要先演茄喱啡捱上去，但我冇，完全平步青雲。」直至1991年合約完滿，當時綺琴慢慢感覺到機會愈來愈少，她便決定往外闖，飛到馬來西亞發展，沒想到由天堂跌落到凡間，她說：「當年馬來西亞製作冇香港咁先進，冇部門，演員化妝、整頭、服裝都要自己去安排，以前無綫咩都被人照顧得好好，去到馬拉咩都要自己做，好似好慘咁，我都有諗過：『使唔使做到咁呀？不如返去啦？』，但後來又覺得呢個係個學習嘅過程，咩都由低學起，反而先體會到演員係點樣一回事。」
綺琴在馬來西亞開立製作公司，學習到不少幕後工作技能。（圖片：受訪者提供）
綺琴12年前的照片，非常青春無敵。（圖片：受訪者提供）
重返無綫，綺琴原來是為了囝囝，她說：「有時劇集重播會見到我，個仔就同同學分享話媽咪係演員，點知班同學唔信佢，阿仔就好想我拍返戲，證明畀班同學睇，加上我個仔都大，要學識獨立，而我真係有戲癮，所以就返無綫。」當然，離開足足12年，她明白一切都要由頭開始，綺琴說：「始終年紀大咗，我又走咗12年，大家都已經唔記得晒你，由頭嚟過係必然，以前套套都做女主角，當然個心都有少少唔舒服，惟有自己安慰自己，因為我初入行冇經歷過呢個階段，依家咪要受返囉，其實做配角可以體會到好多，而且我喺馬來西亞做過製作，明白幕後嘅辛苦，有時候被助導分到天地時間，咁一定有佢哋原因，咁我會take it easy，『年紀大記唔到咁多對白，拍完一場，中間有好多時間畀我去記下一場對白，都唔錯吖！』如果只會鬧人咁樣對你，你自己只會愈做愈唔開心。」
雖然近年綺琴都是擔任配角，但她樂在其中。（圖片：受訪者提供）
《好日子》入面，綺琴演黃淑儀的囡囡。（圖片：《好日子》電視截圖）
綺琴除了《好日子》的演出外，在《白色強人》都有一幕戲飾演位高權重的富婆，質疑醫改方案，當時只有一場戲，但她都會答應演出，她說：「就算唔起眼，一場半場我都好樂意去演。人唔會永遠順風順水，總係會有高低起跌，如果你真係過唔到自己嗰關，一係你就唔好做離開，如果繼續做落去，自己諗辦法去釋懷。生活最重要係開心、簡單。」
綺琴工餘時間都要抽空做運動。（《晴報》圖片）
近日剛剛完成《大醬園》的拍攝工作。（圖片：受訪者提供）