【逃犯條例】林鄭月娥晚上現身回應 500字強烈譴責佔領為有組織暴動

《逃犯條例》修訂觸發金鐘大規模佔領行動，至今已造成最少22人受傷，警方被批評濫用武力攻擊示威者，政府一直未有回應示威者撤回修例訴求。至晚上8時許，特首林鄭月娥現身拍片回應市民，形容今次是一場暴動，「係任何文明、法治社會都不能容忍」，並予以強烈譴責。

500多字講話全文如下：

各位市民，今日喺金鐘一帶令人痛心嘅場面，呢啲破壞社會安寧，妄顧法紀嘅暴動行為，係任何文明、法治社會都不能容忍，好清晰呢啲唔係和平集會，而係公然、有組織咁發動暴動，亦不可能係愛護香港行為。

今早有人不顧市民安危，佔據同堵塞馬路，癱瘓交通，嚴重影響社會運作，從下午開始更加有人多次衝擊警方防線，做出危險及可致命行為，包括放火、利用削尖鐵枝、掟磚攻擊警察，破壞附近公共設施，令到一般市民、想和平表達意見嘅年輕人、記者、警察、公務員同事的安危受嚴重威脅，我哋必須強烈譴責。

我明白今次政府修例，喺社會上引起強烈正反意見，政府已經多次積極回應同解釋，事實放在眼前，每當涉及中央同特區、內地同香港嘅議題，都會被部分人士挑起矛盾，面對呢啲矛盾同紛爭，激烈對抗絕對唔係解決方法。

請大家靜心諗一諗，呢一啲騷亂場面，近年已經唔係第一次。香港係一個自由、開放、多元社會，對任何事都可以有唔同意見，但無論贊成定反對，表達意見嘅方式都有底線。如果用激進暴力手段就可以達到目的，呢啲場面只會愈演愈烈，肯定對香港帶嚟傷害。

我希望社會盡快回復秩序，更加唔希望有任何人喺暴動中受傷，我喺度呼籲所有熱愛呢個地方嘅市民大眾遠離暴力，我相信香港呢個文明社會，仍然可以用和平、理性、守法方式，為香港整體利益解決任何問題。