現年53歲的劉嘉玲素來熱愛運動，工餘時間不時會跟好友齊齊行山，非常寫意自在。日前劉嘉玲孖住另一個行山發燒友「發哥」周潤發，一齊行山嘆美食。劉嘉玲更將兩人合照上傳到社交網，並表示自己會開始行山，當年是受到發哥嘅啟發同鼓勵。劉嘉玲話：「感謝發哥五年前引導我行山這個運動。」而現年64歲嘅發哥Keep得咁好，如此精神健康，狀態大勇，劉嘉玲稱一切是行山嘅好處，佢話：「記得當時他（周潤發）對我說：人在山裡行，快活過神仙，有益身心，逆生長，這幾年果然收穫豐碩」難怪劉嘉玲同周潤發看起來都好年輕，都係運動嘅功勞！
（劉嘉玲不時孖住發哥行山)
之後劉嘉玲又提到與發哥行山嘅最大樂趣，是運動結束後，發哥會帶佢去食地道的、廉價嘅香港美食，令佢都不禁大讚同發哥行山係「滿滿的幸福感！」發哥貴為巨星，依舊親民貼地，熱愛香港地道美食，實屬難得！
現年64歲的發哥絕對稱得上係娛樂圈行山大隊長，不時鼓勵一班後輩齊齊行山，享受運動樂趣。早前就算落雨，天氣不佳，依舊帶隊同一班圈中好友，包括藝人蔡一智、方中信、黃德斌及導演方平等人行山。蔡一智有留言讚發哥：「跟住偶像（發正先鋒）發哥去跑山，梗係落雨也不怕，落雪也不怕！happy trail day！運動是幸福！」。發哥非常熱愛行山，就連生日亦要喺山上度過，今日發哥大壽，一眾好友應佢所求，陪佢登山慶祝，再飲茶食壽包，非常開心！
（發哥生日亦不忘行山）
除咗行山，發哥都好支持其他有益身心嘅運動，亦好關心圈中後輩。曾患抑鬱症的歌手盧巧音（Candy），近年愛上跑步，靠跑步抗抑鬱症，發哥都好關心佢嘅近況。早前盧巧音跑步時巧遇發哥，Candy見到自己偶像非常興奮，而發哥還特地為佢打氣：「身體是自己的，後生仔不要去得那麼盡。」鼓勵盧巧音好好運動，努力戰勝抑鬱症，非常暖心！
發哥貴為巨星，唔少人都想捕捉佢嘅身影，更有市民成立「捕獲野生發哥」Facebook專頁，專門追蹤發哥岀沒地點，見到網友分享同發哥嘅自拍照，真係令人羨慕！而根據大家整合嘅資料，整理岀幾個較容易捕獲發哥嘅行山熱點，分別係大帽山郊野公園、城門水塘、鳳凰山同埋大東山，大家行山都可以試下呢幾條路線，睇下撞唔撞到發哥！