消除負面標籤 助年輕媽媽自強重生

做阿媽唔容易，BB出世後先係挑戰。而對年輕媽咪嚟講，面對湊B同生活難題，無經驗又無人教，簡直毫無頭緒！但最近喺講座上，認識咗浸信會愛羣社會服務處培訓及就業服務督導主任梁振康，原來佢哋一直推行「年輕媽媽生涯支援計劃」，幫助15至25歲嘅年輕媽咪過渡成母親角色，仲會訂定事業計劃，教埋湊B兼裝備自己。

梁主任話，社會對年輕媽咪多少有負面標籤，令佢哋唔敢求助，有時換片乾唔乾淨、BB有濕疹都唔識處理，收入唔夠又唔敢出聲。幸好呢個計劃會喺生活層面協助佢哋，例如幫手搵屋租兼陪睇樓，又或搵人捐BB車等物資，仲有兒童醫療券睇社區醫生，兼顧實際需要，夠晒貼地。佢哋仲會舉辦「媽‧寶學堂」教授職業技能，裝備自己，甚至鼓勵做義工，以獲得工作滿足感。

愛羣社會服務處仲會聯繫唔同公司提供「寶寶友善」工作措施，例如彈性工時或帶埋BB返工，又會聯乘企業舉辦啱年輕媽媽嘅活動，就好似今次由Tycoon滿貫贊助嘅「兒童情緒管理及常見疾病講座及兒童工作坊」，就邀請醫護人員講解，資訊夠晒實用，講座上啲媽咪都非常年輕，但抱住BB時母愛出晒嚟個樣，就知好媽媽同年紀無關，只要有愛，都可以係偉大媽媽！