小編呢排日日都追住睇無綫節目《媽媽唔易造》，事關身邊好多媽咪朋友都好關心，擔心做高齡產婦，又擔心好難懷孕咁，琴晚播出第二集，節目入面訪問咗《東張西望》主持人游莨維同太太Clara，有一蚊Joe之稱嘅游莨維早前用Big Big Channel直播太太生產過程，曾經引起好大嘅爭議。節目中講到由於兩人係姊弟戀，結婚時太太Clara已達38歲，屬高齡產婦，加上輸卵管塞住，所以決定人工受孕趕快「造人」。「求孕」過程中，他們表示香港公立醫院需要排期兩至三年，而私家醫療費用高昂負擔不起，於是在朋友的介紹下北上嘗試「神醫」的中藥醫理，並接受有關人工受孕的手術。
游莨維同Clara分享求孕的過歷。(圖片：《媽媽唔易造》電視截圖)
一蚊Joe在網上睇到被認定是「不育聖手」的羅湖試管嬰兒專科醫院，所以帶埋太太北上試試，他們在節目中分享到醫院嘅環境同埋過程，講到都幾恐怖，佢哋話：「去到不孕科時，成間醫院係烏燈黑火閂晒門，結果我哋門口偷望一陣，有個白袍醫師出現......佢除咗清楚介紹嚟緊有咩步驟呢，仲特登企起身去辦公室後面，逐支錦旗打開，每一支證明佢成功咗。」而太太都話見到醫生著白袍但戴浴帽的造型，的確會嚇一嚇，當被叫名入房時，原來上一位病人還在，而診療過程中，不停都有人出出入入房間，私隱度欠奉，又不停被打尖。她說：「當係一個經歷，熱鬧咪一齊傾，反正情況都差唔多，但衛生情況同香港真係好唔同，四人輪住檢查，但過程佢冇洗手同換手套，所以如果你好緊張呢啲，初頭真係會驚驚。」後來排卵成功，抽卵過程中，游太稱內地醫院不可以麻醉，所以過程非常痛苦，而一蚊Joe亦指出收集精液的過程不太嚴謹，朋友仲同佢講笑問會唔會過程中搞錯其他人精液。
Joe太太直言內地醫院衛生情況跟香港大有出入。(圖片：《媽媽唔易造》電視截圖)
一蚊Joe話胚胎成功著牀，但自己身為家中長子有傳宗接代的壓力，所以暗中有問過醫生可唔可以揀性別，他說：「萬一如果係女咪又要追？好大劑喎！最終係仔，終於同太太鬆一口氣。」他直言見到太太受孕過程的痛苦，自己都唔好受，但自己選擇同呢個女人一齊生活落去，兩人走過呢一段路，反而關係更加珍貴。
Joe在網上分享做爸爸的喜訊。(圖片：游莨維IG)
這個得來不易的囝囝終於出世，不過唔知如果生女，咁佢會點呢？(圖片：游莨維IG)
節目出街後，小編發現好多媽媽Group或者親子討論區都有討論，但好多「過來人」媽媽就反駁一蚊Joe同太太。網友留言如下：
「懷疑佢果間會唔會係公家？無理由咁惡劣，深圳中山可以全麻抽。（全身麻醉抽卵）」
「深圳中山泌尿喺福田架，私家，乾淨先進。好彩我未做呢個節目已上去，如果唔係我都俾佢嚇窒...」
「我係香港大學深圳醫院做ivf，前日局部麻醉抽左（咗）卵，都無佢講到咁恐怖..又話唔換手套又話有個人係你隔離一齊抽卵傾計囉，如果我睇完呢套嘢先去肯定都會淆。」
「係啦，我而家都係深圳中山做緊......完全唔一樣，就算抽血護士 我見佢地（哋）都有用酒精消毒隻手~」
「中山個門口好靚喎，一定唔係Master joe講嗰間咁恐怖烏燈黑火嘅醫院。」
「有冇人知master joe所講嘅大陸神醫係邊個？好似好堅，連輸卵管塞左都通得返！」
一家三口非常幸福。(圖片：游莨維IG)
未知是否區域不同，討論區入面的「過來人」媽媽網友都話內地醫院環境非常不錯，更有不少在內地成功例子，一蚊Joe可能會收到好多電話查詢神醫嘅資料。
雞寶寶來到游家，一切都變得圓滿。(圖片：游莨維IG)