金燕玲患癌生不如死爆抑鬱 揭一法捱過5次化療

現年64歲「配角天后」金燕玲自從今年2月不幸確診患上子宮癌就開始與惡性腫瘤作戰，準備接受6次化療療程，並決定每次完成化療後會現身密友蘇施黃主持的電台節目《大玩派》。前4次化療的治療過程為金燕玲帶來無盡痛苦，副作用馬上隨之而來：脫光頭髮、全身劇痛。曾經是以艷星姿態接拍多部艷情風月片，又曾拍過大膽裸露寫真的她，面對容貌、身形的改變，人生頓時跌落低谷。去到第5次療程，金燕玲情緒也崩潰了，她知道癌症堪稱香港人疾病頭號殺手，每年奪去不少人的生命，所以面對自己痛不欲生的抗癌路，曾一度爆發抑鬱症。不過除了化療與標靶藥，多得蘇施黃陪伴，她慢慢調整生活方式同飲食習慣，不開心時便找朋友打麻雀，反而覺得死亡不可怕，甚至話：「人總有日都要死」。

{{hket:inline-image name="13.jpg"}}{{/hket:inline-image}}

{{hket:inline-image name="16.jpg"}}{{/hket:inline-image}}

(電影《一念無明》劇照)

腫瘤太惡開刀切內臟 化療間狂甩髮兼全身劇痛

金燕玲憑《地下情》及《人民英雄》連續奪得金像獎最佳女配角，又曾以《獨立時代》、《一念無明》2度獲得金馬獎最佳女配角獎，是著名實力派演員，不過2月開始確診有子宮癌1期。因在2005年已患過乳癌，所以當知道病情後她很冷靜，曾不想公開病情，怕令囡囡、妹妹擔心到喊，令她更擔心，情緒易波動，所以她只跟好朋友關之琳和蘇絲黃坦白，表示身邊人的無言支持就是最大的幫助，已經足夠了。知道患癌後7日，金燕玲後就要做手術，雖然只是初期，不過因USPC惡性腫瘤太惡，不可做微創手術，所以必須一次過切除淋巴、子宮和盲腸，她說︰「佢(醫生)問我忍唔忍得痛，話痛幾分鐘，驗得清楚啲，真係好痛，痛到不得了，我好辛苦，頂唔到，自己做之前兩日流眼淚。最後全部切晒，要make sure，因為呢個瘤好陰濕，要好仔細做化療同電療，希望可以控制到。」開完刀，金燕玲身體好弱，但都繼續死撐，扮精神同囡囡傾視像電話。

「我以為自己可以捱到化療。」

雖金燕玲早已有心理準備，但到真正面對副作用時，心情極之難受。皆因金燕玲做完首次化療後狂甩頭髮，初初她噴髮膠Gel住，可是洗頭時成個浴缸都是頭髮，洗完要抺乾已摸到後腦位有一個個窿，好像地中海、生癩痢頭。她邊講頭髮對女人很重要，邊忍不住流淚，最後決心到髮型屋剃光頭髮，戴帽或頭巾以免在街上引人注目。除此之外，金燕玲全身骨頭都好似被針刺一樣劇痛，只要一掂到皮膚已經痛到難以忍受，讓她真正體會到甚麼叫生不如死。

{{hket:inline-image name="14.jpg"}}{{/hket:inline-image}}

爆發抑鬱即搵朋友打麻雀抗癌

今次終於去到第5次化療，金燕玲甩光頭髮，餘下8條眼睫毛，故頭上戴住圍巾。不過她化上淡妝，精神不錯，原來胖了足足7.7公斤，目前有58.9公斤。為甚麼化療期間人人暴瘦，她都還可以發胖，積極抗癌？好朋友關之琳就話每次金燕玲不開心，好朋友都會陪她打麻雀：「我知佢真係一個幾難過嘅關，大家都要鼓勵佢，阿蘇會陪佢打麻雀，我唔識打但可以陪佢傾偈，而且佢都要好好休息回復體力，我相信佢捱得過。」

金燕玲話自己其實因身形和容貌有變，全身骨痛，曾經有少少抑鬱，不過如今學會正能量看待生命緣起緣滅：「我覺得只要係人，始終有一日都要死，因為癌症死又好，唔係又好，其實到最後都會死，只係先後啫。我意思唔係要自己短命，我意思係人走到後面，先諗到要好好哋去take care自己身體，小心飲食。點解食嘢小心？就係要整好自己嘅架生夠強，萬一你有病時，你先有個夠強嘅身體同佢抗。因為你身體唔夠強時，你病時你會好辛苦，你又唔夠佢嚟，要照顧你嘅人都會好辛苦。其實唔好到病時先點點點，平日你真係要take care自己，生活方式同食嘢呀。好似我咁我都幾小心，都會病。」即使罹患子宮癌，金燕玲仍態度樂觀，堅持打扮自己，她表示：「打扮唔係為咗人哋，係為咗自己，見到自己咁靚，心情都會變好」，所以各位正在抗癌的戰友要加油！

{{hket:inline-image name="11.jpg"}}{{/hket:inline-image}}

{{hket:inline-image name="12.jpg"}}{{/hket:inline-image}}

{{hket:inline-image name="15.jpg"}}{{/hket:inline-image}}