處境劇《愛回家之開心速遞》締造出多對熒幕情侶，如送水輝和大小姐、熊若水和龔燁、熊尚善和潮偉、金城安和Bonnie等等，全部都大受歡迎，熊家幾姊妹全部都有著落，唯獨是熊家三女熊心如(蘇韻姿飾)，多次在感情上泛起了漣漪，不過次次都係無米粥，最近劇情安排她跟朱凌凌的哥哥朱天梯有不少互動，但十畫未有一撇，到底心如最終會情歸何處呢？
蘇韻姿飾演蘇心如一角，受到廣大市民歡迎。（圖片：蘇韻姿IG）
蘇韻姿（Andrea）接受《晴報》的訪問，她直言自己都好恨有個穩定的感情線，她數數手指原來都曾經有不少感情線培育過小幼苗，可惜都未能開花結果。心如的感情線由劇集最初期的龍璟風（陳浚霆飾）開始，雖然風少係一隻鬼，但對心如關心兼呵護備至，不過後來兩人感情也隨住陳浚霆離巢而不了了之。隨後，池子孝（阮政峰飾）以長時間作戰的方式追求心如，又為了拉近兩人的距離而報考DSE，成為全港最老的考生，雖然心如曾經短暫同阿孝一齊，但熊樹根（劉丹飾）極力反對，加上心如始終個性冷若冰霜，最終導致兩人分手收場。
《愛回家》最初初開始是有風少的一個鬼魂穿插熊家，更同熊心如有少少曖昧之情。（圖片：蘇韻姿IG）
劇中池子孝歷盡艱辛追求熊心如，可惜都係分手收場。（圖片：蘇韻姿IG）
補習社拍檔佐治（張明偉飾）暗戀心如，可惜因為講大話，搞到心如勁嬲，反而朱天梯(梁証嘉飾）跟心如碰頭之後，劇情未開始發展感情線，網友就已經紛紛留言大讚兩人登對，好期望成為一對熒幕情侶。問到Andrea說：「我感情線好亂，都未知之後會點，睇編劇點寫啦，次次有感情線都有事發生，我懷疑係咪我個人有問題，係咪要檢討一下？我希望之後有機會發展穩定嘅感情線，我知大家好鍾意我同朱天梯，可能對觀眾幾有新鮮感，話晒心如好耐冇拖拍喇陰公。」雖然暫時未知情歸何處，但Andrea直言拍《愛回家》令她獲益良多，她說：「其實拍《愛回家》好開心，大家都好錫我，我中文唔太好，有時候NG都唔會怪我，好似溫室咁。我希望將來可以有機會試試接拍其他劇集，有更多挑戰畀我可以急速成長。」
佐治暗戀心如，但就呃對方借意親近，反而激嬲心如。（圖片：蘇韻姿IG）
朱天梯出現未知是否留有伏線，讓心如終於有對象呢？（圖片：蘇韻姿IG）
之前Andrea在IG直播時都分享到她有思鄉病的情況，因為2016年Andrea為了參選港姐而離開土生土長的加拿大，家人繼續留在當地生活，正所謂每逢佳節倍思親，每次有大時大節，她都特別掛住屋企人，她說：「唔經唔覺2016年參選到依家，已經3年冇返去加拿大，其實我連行李都冇執過，之前都係透過視像叫媽咪幫手執少少行李寄畀我。不過今年我已經請咗假，希望可以抽時間返去見屋企人，但我唔會放棄香港事業，能夠喺劇集入面有機會演戲，又得到大家鍾意，我好開心，我會繼續努力做去好佢。」雖然Andrea的家人不在身邊，但幸好在《愛回家》認識到好多好朋友，除了熊家一家人私底下都會約食飯聚會之外，熱愛攝影的Andrea同阮政峰、周嘉洛、馬貫東、林凱恩私下都是好朋友，經常一齊約出去影相打卡post IG，咁多朋友陪你，一定要留喺香港好好發展，加油！
左起：馬貫東、林凱恩、Andrea、阮政峰和周嘉洛老友鬼鬼，經常約出去食飯、影相、郊遊。（圖片：蘇韻姿IG）
Andrea熱愛攝影，鍾意四圍去影靚相。（圖片：蘇韻姿IG）
Andrea跟「家姐」呂慧儀和「姨甥」周嘉洛感情要好。（圖片：蘇韻姿IG）