【投訴之都】落機5分鐘未等到BB車出嚟 港媽狂鬧地勤：我坐商務艙㗎

服務業前線員工的辛苦之處，相信是在於遇上難纏的野蠻顧客。有地勤人員在網上指出，自己近日遇上一名「怪獸港媽」，對方落機5分鐘後已表示「等咗好耐架BB車都未出嚟」，要求他再「催下」，更稱「我坐商務艙㗎」。雖然他已解釋其他同事正在處理，但該名港媽卻怒稱要投訴他及其同事，「我一定會投訴！仲要投訴你！畀你個名我！」

港媽：我嗰架有priority tag㗎！

該名自稱「地勤小薯」的網民日前向Facebook群組「西客之道 Hispitality Secret」投稿，指事發於上月26日，當日他接手處理的航班，「有十幾部BB車要人手load上嚟，真係辛苦晒機底同事」。然而，一名在登機橋外的「尊貴的商務艙媽媽」，指自己等了良久，在橋內的同行者仍未推BB車出來，「我等咗好耐架BB車都未出嚟，我坐商務艙㗎！我未試過咁耐都未拎到BB車囉！你睇！連機師都出埋嚟啦BB車仲未到！」但地勤小薯指出，其實當時港媽只等了5分鐘。

港媽指出，地勤小薯於是向港媽解釋，無論是商務艙還是經濟艙，寄艙的BB車都無分別，都是同一時間由人手拿上來。未料，港媽繼續發威道：「我嗰架有priority tag（優先標籤）㗎！」對此，地勤小薯繼續解釋：「都無分別㗎。同埋可能全部同一時間擺晒出嚟，你同行者都需要時間整理再推出嚟，或者你坐低等下啦。」

港媽不聽解釋稱要投訴

港媽堅持「企喺度等」，如是者1分鐘後，她再度不耐煩，「你可唔可以催下架BB車呀！有乜理由咁耐呀！」地勤小薯稱其同事已在跟進中，惟港媽發難表示：「我成日都搭你哋，我未試過等架車等咁耐㗎！你企係度乜都唔使做㗎？！」其後，她更表示：「我一定會投訴！仲要投訴你！畀你個名我！」

港媽拍下地勤小薯的名牌後，「點知個女人影完名牌仲想影我個樣，我就拎轉身話佢知影名可以，影樣唔得，然後佢繼續偷影。」此時，其同事與最後一名客人，推著BB車步出，「佢就話要埋我果個同事的名。咁同事都無所謂呀咪畀佢影。」原來，港媽的同行者是工人姐姐，「自己手腳慢最後先出」，而且是坐經濟艙。

樓主：你以為行李已經喺行李帶等緊你？

最後，地勤小薯在文中表示，他很想跟港媽說，「其實BB車出嚟的速度時快時慢，10分鐘清晒客同10幾部BB車已經叫超快，但你呢d怪獸港媽係都要係個仔女面前衝出嚟X。就算畀你好快拎到BB車出去，你以為你件行李已經喺行李帶等緊你？以嗰個落機速度我諗連頭等行李都未轆到出去呀。到時你係咪又去詢問處鬧點解你坐business但件行李仲未出呀？」

網民認為港媽行徑野蠻

此事引來網民熱議，不少人認為該名港媽十分野蠻，「坐咩class都好，同『品』無關係，本身個人係X就X，唔等得坐私人飛機啦」、「通常好強調自己乜class嘅人至無class」、「咁有本事買架可以摺到好細嘅BB車拿上機，或者坐私人飛機拉」、「佢應該將個priority tag掛係自己個頭度嘛」、「等多陣使死咩」、「咪以為香港人好有品，好有水平」、「呢啲港媽好黑人憎」。