「順利過關成為書僮，一切都盡在我掌握中。愈來愈接近秋香姐，今日心情確係唔同，確係唔同。」《唐伯虎點秋香》嘅笑位多到數唔晒，而且仲一啲都唔低俗，樂而不淫。大個咗之後睇，你會發覺，度橋嘅人真係識好多嘢，呢個人，正正係谷德昭。
不過原來佢唔係一開始就對自己嘅劇本好有信心。谷德昭同周星馳並唔係一拍即合，動搖咗佢寫劇本嘅信心同決心。幸好佢哋第二次見面非常投契，促成咗《家有囍事》呢套神戲，二人仲成為咗好朋友。
80、90後對谷德昭呢個名一定唔會覺得陌生，事關好多陪住我哋長大、播過二萬9千次你仍然會坐定定睇嘅電影，都係佢嘅作品。谷德昭畢業於加拿大的西門菲沙大學，主修傳理系，副修經濟學。畢業之後就加入影圈，先係同喜劇導演高志森參與編劇工作，後來編而優則導，谷德昭嘅電影人生涯創作過無數喜劇，佢好似天生就有喜感一樣，唔單止佢自己幽默，仲有魔力令到佢嘅演員都變得幽默，好似變咗另一個人咁。
- 5獲金像影帝，又Chok又型嘅梁朝偉喺佢嘅手下都變成笑匠，佢形容梁朝偉本身都係一個「冇幫襯」又「抵死」嘅人，《行運超人》嘅賴料布一角將佢嘅喜劇細胞發揮到淋漓盡致。
- 1991年張曼玉主演《阮玲玉》，並獲得了柏林國際電影節1992年最佳女演員銀熊獎，同一年佢放低身段，演《家有囍事》嘅荷里玉，同樣癲喪生鬼。
- 鄭中基由歌手轉型為演員，佢喺《行運超人》嘅「斷蟹」已經嶄露頭角，之後嘅《龍咁威2003》更將佢捧紅、奠定佢搞笑形象。{{hket:inline-image name="08JLC005__20171108_L.jpg"}}{{/hket:inline-image}}
谷德昭於九五年開始執導首部電影《呆佬拜壽》，至今執導咗十七部電影，除咗九七年《求戀期》，全數都是喜劇。除咗編導佢自己落場做演員嘅場口都非常精彩。其中《食神》入面嘅唐牛可以話係最多戲份，而《唐伯虎點秋香》對穿祥一角仲係令人印象非深刻。
飛到老鍊咁高。
原來對穿祥一角都係臨時加落去。當時一場戲本身淨係講王爺帶住奪命書生去華府「發爛渣」，谷德昭就覺得淨係武鬥唔夠精彩，所以就加插咗文鬥呢Part。負責武鬥嘅「奪命書生」劉家輝當時就話文鬥唔好搞佢，環顧片場，最後都係由谷德昭親身上陣，成就咗呢一幕經典。
母親、姪仔十二年前先後離世，谷德昭遇上人生低潮，嗰段時間谷德昭經常去戲院搵喜劇睇，佢發現，如果睇到一部好笑喜劇，原來係好開心。除咗睇喜劇，佢仲做運動製造快樂荷爾蒙，打羽毛球、打網球或者跑步，現在瘦咗二十幾磅。並唔係外間傳嘅患病暴瘦，比減肥之後嘅佢更加健康。
1992年谷德昭拍咗《家有囍事》，谷德昭當時微服戲院睇觀眾反應：「啲人係笑到失咗控制，有幾個觀眾係睇到四十幾分鐘嗰陣係笑到企咗起身之後冇坐低，我好鍾意散場嘅時候匿喺人群聽佢哋講咩，當時係冇手提電話，有幾條友「呯拎嘭欄」咁走，佢走去大堂電話度打畀朋友，話啱啱睇咗套好好笑嘅午夜場，佢即刻睇多次子夜場，就幫朋友買埋飛叫佢哋依家落嚟，當時我對眼係有淚水。」佢話散場嘅時候觀眾出嚟係一路笑，佢形容話覺得呢班人係短期內都唔會做壞事；唔會打交；問佢哋借錢佢哋一定會借，佢話原來喜劇嘅力量係可以大到咁，所以佢如果有能力會繼續寫、繼續拍喜劇。