【安心偷食】邪！蘇永康醉後出軌新歌急剎停 為許志安蝕六位數「犧牲」張繼聰

上星期爆出許志安同黃心穎背老婆鄭秀文同男友馬國明偷食事件轟動港，所有主角身邊嘅人同事全部都受到牽連，無一倖免。繼黃心穎所有有份參與嘅劇集被抽起之後，許志安老友蘇永康（阿公）都因此「自抽」一首講關於「醉後偷食」嘅新歌，估計因為咁而蝕廿萬。

{{hket:inline-image name="42429029_1128665930619460_8183313028746377947_n.jpg"}}{{/hket:inline-image}}

蘇永康日前受「安心偷食」事件拖累，被網民翻炒佢嘅負面新聞，激到佢同網民隔空互片。據知蘇永康原定推出新歌《你哪位》，如「誰人敍舊完了，假借烈酒，話沒有人理」、「原諒有家室後，豺狼已再沒甚麼需要」，歌曲尾段「我珍惜這幸福和戒條」偷食最終得到寬恕，同現實中安仔獲太太原諒嘅情形都不謀而合。歌曲MV仲要係女主角主動情挑由張繼聰飾演嘅人夫。MV早於三個月前已經完成，製作費逾20萬，而且係配合蘇永康6月紅館個唱，又同2月出街的嘅另一首父子情歌《All That Jazz》有連貫性。由於成個Project太「應景」，視安仔為「一世兄弟」嘅佢以行動捍衞好友，為免再觸動大家神經同喺當事人傷口灑鹽，蘇永康故忍痛向唱片公司要求抽起新歌。

{{hket:inline-image name="36647368_507533982997622_3688868121143148544_n.jpg"}}{{/hket:inline-image}}

蘇永康所屬嘅唱片公司承認《你哪位》暫不派台，宣傳人員話會「尊重阿公意願。」

張繼聰讚蘇永康夠義氣

至於MV男主角張繼聰知道MV被抽起都有啲錯愕，但對呢個決定都表示理解同明白：「絕對冇失望，合作過程好愉快，本來我話唔收錢幫手拍，但阿公夾硬塞咗封利是畀我。」張繼聰認同佢呢個決定夠義氣：「佢一向係好人，記得當年我做新人時，佢係有好多經典歌嘅實力歌手，佢喺無綫化妝間主動行嚟鼓勵我，叫我唔好理啲閒言閒語，之後我拍劇，佢又主動Send好長嘅Message，話有睇我嘅劇，叫我畀心機，我好感激。」

{{hket:inline-image name="bkn-20190222155228605-0222_00862_001_07b.jpg"}}{{/hket:inline-image}}

落選香港先生急住出嚟抽水；蘇永康就為避免事繼續發酵，喺當事人傷口灑鹽而「自抽」新歌，真正嘅朋友係點，高下立見。