麻煩客大疊20蚊紙繳費1萬 便利店員「好合作」數足45分鐘

即使作為顧客，也不應對店員強人所難！有便利店店員近日遇到客人拋下一大疊20元紙幣，來繳付共1萬元的費用。店員為免數錯，足足花了45分鐘才數完銀紙。對此，有網民認為該名客人不知所謂，但亦有不少人質疑店員數得太慢、效率低。

客人用20蚊紙繳費1萬元

「是咁的。我未見過咁無恥嘅香港人。」有便利店店員向Facebook專頁「西客之道 Hispitality Secret」投稿，指有男客人帶同妻兒、家傭前來，並將一疊錢直接丟在櫃枱上，稱要繳付1萬元的費用，「我望住全部$20紙，呆咗5秒。我有無睇錯？無。係一萬蚊$20紙」。其同事見狀後表示：「先生，你交費？我地呢度唔係銀行啊，有權唔收㗎，你呢度咁大面額......請問呢度每疊幾多張㗎？」

客人遭拒後態度惡劣

見對方沒有回應，樓主同事再度詢問：「先生請問呢度每疊幾多張啊？我地呢度唔係銀行，驚數錯或者數漏......」此時，男客人「開始嚟料」，表示：「我夠知你地呢度唔係銀行啦！我點撚知呢度每疊幾多張啊？！我要交費啊而家！數就數啦！九唔搭八！」

店員數足45分鐘

樓主續指，同事無奈屈服，而男客人則望住他數錢，「望咗5分鐘，買咗枝糖。望咗10分鐘，買咗排朱古力。等咗15分鐘，叫老婆睇住。等咗20分鐘，叫個工人係到睇住。就係咁，佢頭也不回地帶住老婆同個仔走咗，留低工人喺到等。我同事都好合作，為免數錯或數漏，好細心咁數。足足數咗45分鐘。」最後，樓主在文中表示，自己對於今次事件，「真係好嬲」。

有網民撐店員

此事引來網民熱議，有人認為該名男客人不知所謂，「分分鐘係阿仔啲過年利是，而家都要摷埋出來交費」、「銀行超過200張都收費，最重要你唔可以唔知銀碼幾多，唔啱數係會比人彈返出嚟，叫佢數啱先埋櫃位」、「一定唔可以畀佢走，留工人喺度都唔得，萬一唔啱數點算？數清楚仲要畀單佢」、「好大個官威呀」。

有網民質疑店員數錢太慢

另有網民質疑店員數錢數得太慢，「500張要9個字？」、「呢啲工作效率真係無敵，平均1分鐘數11張，5秒數一張......唔怪得最低工資一路都升唔到上去」、「咁我做餐廳10萬蚊生意埋數咪要數到第日開舖？」對此，有網民回應：「成萬銀一個數完，再double check再叫第二個同事數多次，再double check，45分鐘叫快了！」、「你快得一次，下次又嚟搵你，做快無錢分，小心啲總無錯！最重要態度差......」、「數45分鐘算好人，係我就慢慢數，數夠兩個鐘！」

法例：交易雙方可自行決定交易條款

據了解，根據現行《法定貨幣紙幣發行條例》及《硬幣條例》，所發行的紙幣和硬幣均為香港的法定貨幣。作為法定貨幣，它是一種有效和合法的支付媒介，在法律上被視為可充分及有效地履行支付義務。然而，在任何商業交易中，交易雙方均可自行決定交易條款，包括決定使用何等支付媒介。對商品和服務供應商而言，是否接受任何面額的紙幣和硬幣以支付某項交易純粹是他們的商業決定。