4月4日兒童節的大日子,當然是小朋友的天下,近年好多明星藝人都唔會收收埋埋,喜歡在社交平台分享自己下一代的照片,吸引更多家長Fans之餘,又可以透過社交平台交流心得,唔少BB一出世就成為網紅,非常盞鬼!其中最具代表性的就是Abigail,Abigail是歌手陳柏宇同太太符曉薇(Leanne)所生的囡囡,她出世的第一日已經開了Instagram帳戶,父母每日就會更新新照片,無論是柏宇的歌迷、Leanne定Abigail的粉絲都爭相Follow,而兩位父母都好鍾意抱住Abi開直播,Abi細細個就學識望住鏡頭,依家半歲大,經常對住鏡頭笑,氹得收睇嘅觀眾非常開心,絕對係「開心果」。
Abigail係開心BB,大笑時更會見到兩個大酒窩。(圖片:Abigail IG)
爸爸陳柏宇對「餅印」囡囡可謂錫到燶,幸好Leanne都唔會呷醋。(圖片:Abigail IG)
同樣地由出世開始就收Fans的就係林芊妤(Coffee)的BB仔翟德彥,Coffee經常拍片和影相放上BB的社交平台,更以BB第一身寫留言,非常搞笑抵死,又用「翟伯伯」來稱呼囝囝,非常可愛又惹笑,吸引不少媽咪追隨。
翟伯伯真係好可愛,圓碌碌咁,最正係有個瘋狂媽咪。(圖片:翟德彥IG)
Coffee非常疼錫翟伯伯,每日都會update佢新相片。(圖片:林芊妤IG)
吳日言(Yan)同Coffee差不多時間生B,兩個媽媽一齊搞Baby Shower之餘,一樣為小朋友開Instagram戶口,Yan個囡囡Beatrice眼大大似足媽咪,而且頭髮旺盛,少女味十足。而Yan繼續做職員女性,除了娛樂圈工作外,更同朋友夾份發展日本飯糰生意做老闆娘,努力為Beatrice搵奶粉錢!
Beatrice好多頭髮,相信Yan同老公可以練定手藝為囡囡紮辮仔。(圖片:吳日言IG)
以下呢個BB女平日就比較少見,事關年紀仲細,爸爸好少帶佢出席活動,佢爸爸係邊個?咪就係Mr. 成員Dash啦!Dash同澳門太太誕下Molly,Molly肥嘟嘟好可愛,有時Dash仲抱住囡囡一齊玩結他,希望可以用音樂感染下一代,唔知下一代隊Band會唔會有Molly呢個女將呢?
Molly圓碌碌到底似爸爸定媽咪呢?(圖片:Molly IG)
這個會行會走的算得上是大哥哥,見到個樣就好似已經認得出邊個係媽咪,事關他跟媽咪賴慰玲好似樣,而且他一出世就萬千寵愛,好多靚女如陳瀅、吳嘉熙、蔡思貝等都是他的契媽,契爺鄭嘉穎還為他改了英文名Marat,所以經常被女人包圍到氹氹轉,不過幸好契爺近來生了一個男孩子,長大後就可以一齊玩。
賴慰玲好錫Marat,只要拍劇一有空檔就會帶囝囝出去玩。(圖片:賴慰玲IG)
除了以上幾個BB,仲有好幾位星二代BB一樣好受網友歡迎,當中包括李璨琛的囡囡李元元、林盛斌的細仔Jaye等,而其實早陣子鄭希怡的梁浸浸、陳小春的Jasper和黃伊汶的陳真等都是星二代網紅,BB同小朋友全部都好得意,希望每一個在兒童節都開開心心,健康幸福!
李元元以肉取勝,可愛到極。(圖片:李元元IG)
林盛斌孻仔眼大大好靚仔、好可愛。(圖片:林盛斌Facebook)
左起:Jasper、梁浸浸、陳真同樣是星二代,幾位父母之間有深厚感情,相信他們的友誼一定會延續到下一代。(圖片:鄭希怡IG)