人夫突闖哺乳室亂咁望 新手媽媽嚇親：好彩餵完唔係咪睇晒

哺乳室理應是一個讓新手媽媽安心餵哺母乳的地方，謝絕男士進入。然而，日前一名男子卻以陪同妻子為名擅闖哺乳室，而且更疑「眼甘甘」地亂望其他哺乳媽媽。對此，大批網民不恥男子所為，炮轟道︰「呢個真係堅嬲，基本尊重都無！」

新手媽媽：差啲俾人夫睇晒

一名新手媽媽日前向Facebook專頁「生仔要考牌系列」投稿，指上月23日帶同BB到母嬰健康院，並在哺乳室跟姑娘學習如何餵哺母乳；當時，有另一名媽媽正在哺乳，但未幾離開。10分鐘後，姑娘離開，只剩她獨自在房內繼續餵哺。

未料約5分鐘後，突然有人敲門，「無耐頭先嗰個人奶媽走咗入黎，後面跟住佢老公同BB……我真係呆咗……個老公仲要望住我同佢老婆講：『喂，橫點入咗嚟，同BB包好張包被先。』老婆：『呀吖，唔洗啦……走喇！』」最後，該名新手媽媽在文中怒斥：「X！我唔係同個BB掃風中，放低咗件衫咪俾條粉X睇晒！？哺乳室門口大隻字寫住『只限女士，男賓止步』！」

網民：根本就係搏懵

此事引來網民熱議，不少人認為男子做法有問題，「好懷疑佢特登入去𥄫嘢」、「根本就係搏哂懵！賤男！」、「可以報警喎」。同時，亦有不少女網民表示遇過類似情況，其中更有人表示：「有好多人真係唔知咩叫哺乳室。我見過奶粉爸同人奶媽爭用哺乳室。有去只有布簾格(隔)住哺乳室觀光嘅男士。有鍾意打開哺乳室度門同屏風幫女或新抱搵位嘅長者。有鍾意喺哺乳室吸煙嘅人士。#生第二胎已經唔敢再用哺乳室 #自己帶餵奶巾仲安全。」