喺電影《九品芝麻官》入面殺咗戚家一家十三口嘅常威,究竟識唔識武功?真名鄒兆龍嘅佢原來非常猛料,電影入面,所有演出都係硬橋硬馬真功夫。
童年生活刻苦
鄒兆龍原來並唔係香港人,佢係台灣高雄人。屋企有13個兄弟姊妹,鄒兆龍排行第8,不過由佢好細個已經兄弟分離。因為鄒兆龍嘅爸爸好早就過咗身,媽媽實在養唔起咁多個小朋友,所以有好幾兄弟都送咗去「育幼院」。留喺媽媽身邊嘅鄒兆龍都好生性,5歲已經去做彿具雕刻、麵包學徒幫補家計。不過就喺佢有一次做嘢嘅時候唔小心整傷手,改變咗佢嘅一生。
鄒兆龍手受傷之後去到「國術館」治療,見到有人喺旁邊練功,打詠春樁、武刀槍劍棍等等。佢等到手傷痊癒之後去國術館求師傅教佢武功,鄒兆龍就係喺呢個時候打好基本功。12歲嘅時候,鄒兆龍去到台北投靠哥哥,由於自細練武身手唔錯,俾電影劇組睇中做武行。由於當時身形較瘦小,所以佢嘅第一份替身工作係替女仔,參與之後,佢即刻愛上咗呢份工作。
伯樂洪金寶睇中
之後幾年佢都係做一啲幕後替身工作,直到18歲嗰年,有製片人睇中佢做幕前演出,拍攝佢嘅第一部電影《全力反彈》,輾轉之下透過當時嘅製片人認識洪金寶。當時仲當緊兵嘅佢得到洪金寶賞識加入「洪家班」,邀請佢去香港拍攝第一部電影《烈火街頭》。拍攝呢部電影期間只要一有空檔,又會去其他劇組幫手。7、8年間佢唔只做一個演員、同時係武指(設計動作)同替身,成就佢一身紮實嘅功夫同矯健嘅身手,佢形容當時嘅「洪家班」就係電影圏嘅少林寺。
曾為關芝琳替身重傷
鄒兆龍最重傷一次係1992年拍攝《一刀傾城》為關芝琳替身跳彈床意外喺一樓嘅高度「硬着陸」,佢當時嘅第一個反應係同洪金寶道歉:「對不起師父,動作沒做好。」後來醫生診斷佢背脊有筋骨斷裂,起碼要休養半年。但佢事後只係抖咗個半月,又即刻再返到去片場做替身。呢條鐵打嘅硬漢,敬業到喺行內出晒名。
《中南海保鑣》係李連杰對手。
《導火線》係甄子丹對手。
殺入荷里活
全靠老婆翁為德鼓勵,鄒兆龍喺佢30歲嘅時候毅然去美國讀書,喺佢讀到第二年嘅時候仲收到導演袁和平邀請參與《廿二世紀殺人網絡》續集嘅前期製作,為奇洛李維斯做替身。過咗7個月之後,電影正式開拍,佢仲獲邀出演其中一個角色。佢曾經係李連杰、甄子丹嘅「最強對手」,雖然佢喺香港電影中經常做奸角,但佢堅決拒絕演出踐踏民族、醜化亞洲人嘅角色。
於《廿二世紀殺人網絡2:決戰未來》、《廿二世紀殺人網絡3:驚變世紀》飾演賽洛芙。
同奇洛李維斯有對手戲,同時係奇洛嘅替身。
家庭美滿
鄒兆龍另一個成就係娶到嬌妻翁為德(前名:翁維德),翁為德係1989年參選港姐並得「最上鏡小姐」,二人拍拖10年之後喺1999年結婚,翁為德結束當時喺香港正如日中天嘅事業,專心喺屋企相夫教子,二人育有一對15歲嘅孖仔同一個10歲嘅囡囡。兩人結婚18年一直都非常恩愛,雖然前年爆出「出軌風波」,但太太始終力撐,強調老公係一個有責任感嘅人,兩夫妻彼此相守近28年,對老公有信心。之後鄒兆龍亦發聲明向太太同佢嘅小朋道歉,事情亦告一段落。
翁為德發聲明撐老公。
同前世情人超Sweet。
父親節曬仔女。
「出軌風波」後曬全家福。
鄒兆龍依家主要喺內地同台灣拍戲,上個月收厚酬返台灣代言手機遊戲。
由細細個家境清貧,捱到去台北做替身,再去到香港做幕前,之後不斷增值自己去美國讀書再「打」入荷里活,全部都係有血有汗。51歲嘅佢為維持健美身形,仍然不停健身,而且每餐只食五成飽,冇食油膩食物成30年。鄒兆龍嘅成功,不無道理。