暖心！大懵乘客倒瀉粥兼漏電話 的士司機無嬲仲出手幫佢

香港地好人好事不嫌多！一名大懵女乘客近日搭的士時不慎倒瀉粥，正當她擔心被司機責罵，提出額外支付清潔費時，對方竟表示「唔使收」。其後，她落車回到公司後，更發現將手機遺留在車內；當她聯絡上司機取回手機後，對方不但拒絕收取任何報酬，更主動問是否需要載她回公司。對於司機的暖心之舉，女乘客表示：「好感恩我遇到好似天使一樣嘅司機大哥！」

倒瀉粥一地都係

該名女乘客在Facebook群組「To Kwa Wan 土瓜灣之友」發貼，分享搭的士的暖心經歷。她周一（18日）早上帶着一煲粥「飛的」上班，「轉彎嗰時個蓋飛脫咗，啲粥當然係一齊飛出黎啦。當時已經好驚慌，一嚟整污糟咗人地架車，尤其係一格格嗰塊地氈......想幫佢抹返乾淨都抹唔到。二嚟啲粥係少少熱嘅，坐住嗰位都有粥，一褲都係……」

由於感到不好意思，加上擔心會被司機責罵，因此她落車時向司機表達歉意，「唔好意思吖，我整污糟咗你架車，你收返我幾多清潔費？」不過，司機不但沒有生氣，更回答稱「唔使收」，「我又真唔好意思，最後一番推搪同道歉後，我俾咗張$100叫佢唔使找（車資為$26）。」

落車後發現漏電話

未料，事情並未到此完結。當她回到公司時，竟赫然發現手機遺留在的士上。於是，她立即致電自己手機號碼，司機接聽後問︰「係咪頭先倒瀉嘢嗰個， 漏低咗個電話？」當時司機正在翔龍灣的士站洗車，她於是立即到該處拎電話，「司機無收我贖金，仲問我遠唔遠使唔使車返我返公司。」對此，她直言是「人間有愛」，「想好好表揚呢個司機！好感恩我遇到好似天使一樣嘅司機大哥！畀我再遇到你一定請你食飯！」

網民大讚是好司機

此事引來網民熱議，不少人大讚該位的士司機是「好司機」，「祝嗰位良心司機日日財源滾滾來」、「好的士司機，值得讚揚」、「少有咁好嘅司機！可以去的士司機群組表揚」、「希望良心司機遇見嘅都係好嘅客人，順順利利」。