唔係人人一出世就天生麗質，不過好多女人相信一白遮三醜，所以由中國戰國時代開始，女人已經識化妝去博得異性好感。就算嫁咗俾人都唔可以鬆懈，因為要同其他女人共待一個老公，要保持花容月貌先可以突圍而出。直至現代，女藝人都係好依賴化妝，除咗工作需要，靠濃妝放大表情之外，平時出門都要化，因為喺歲月磨滅下難免會有衰老的徵狀，為免被記者偷影到，佢哋都紛紛化妝遮蓋臉上皺紋同瑕疵。結果女藝人嘅臉上總係化上完美妝容，保持最佳一面示人，佢哋嘅素顏就變得好神秘。不過為咗拉近粉絲同自己嘅距離，不少女藝人主動大曬素顏，以天生好膚質、濃眉大眼暗示自己真係美人胚子。例如以下有唔少TVB女藝人就將一層層嘅化妝品卸走，敢於公開裸肌。
呂慧儀
自從被前夫、好姊妹離棄之後，雖然有龔燁張景淳戲裡戲外嘅陪伴，不過呂慧儀都特別鍾意行山、吹海風，希望放鬆心情。好多網民都大讚佢素顏後皮膚好似剝殼雞蛋咁，係陽光女神，甚至有人讚36歲嘅佢好似細咗20年，成個後生學生妹咁。
滕麗名
滕麗名踢走咗衰人魏俊傑之後就愈來愈靚，容光渙發，原來係因為有愛情滋潤！唔怪之得又靚又索嘅佢成功馭夫，令到對方唔鍾意返屋企都變成住家男啦。
陳煒
煒哥喺亞視同TVB都做過當紅花旦，美貌就唔使人再講，好多90後男網民都話就算姐弟戀都好想同煒哥拍拖！見到《福爾摩師奶》裡面嘅佢有幕被扯甩衫袖，露出白滑肌膚，睇到人眼都唔眨，簡直係魅力沒法擋。
康華
身為美魔女嘅佢雖然已經47歲，差唔多要步入人生50大關，不過佢對眼仲好有神，皮膚亦好白滑，果然係「御用情婦」。
朱晨麗
朱晨麗同馮盈盈一樣都係無眉，不過因為眼大大所以只需化上淡妝補返條眉就靚晒喇。
唐寧
唐寧嘅素顏完全係無得彈，以前佢出演《大唐雙龍傳》扮師妃暄嗰陣已經迷倒好多人，因為真係勁有仙氣，好符合角色氣質。就算依家生咗1仔1女，素顏個樣仲後生過以前，逆生長到好誇張。
李佳芯
李佳芯貴為宅男女神、當家花旦，素顏同上咗妝梗係一啲分別都冇，無論連登、高登等各大討論區都冇負評，證明佢幾咁靚。甚至有網民話雖然佢身材唔係咁突出，不過個樣咁靚，如果做到女朋友，早死10年都制！
陳法拉
陳法拉喺中國四川成都出世，四川盛產美女是常識吧，所以法拉唔化妝都幾靚。一個靚女識得講國語、粵語、四川話、英語、日語，息影深造之後呢排仲話可以與影后妮歌潔曼同劇演出，全部係完美女神。
劉心悠
心悠不嬲俾人話靚嘅，不過因為本身皮膚太白，素顏下面色唔係好夠，補返個唇膏就醒神返晒。
唐詩詠
唐詩詠素顏下冇咗半條眉，好彩隻眼夠大所以都仲ok，只係個樣冇咩氣色，搽返唇膏就好好喇。
麥美恩
麥美恩唔係行女神路線，不過素顏個樣依然好見得人！特別因為佢膚色白、皮膚滑，唔化妝好似仲順眼，符合返佢親民、貼地嘅形象。
麥明詩
麥明詩會考拎住10A成績單張相相信好多人都睇過，雖然依家冇咁啲青春豆，不過素顏都麻麻地，反而化妝先突顯到佢嘅氣質。
張寶兒
張寶兒呢幅素顏相被網民笑咗幾年，因為塊臉膚色蠟黃、大黑眼圈，冇生氣，不過化咗妝就即刻亮眼晒。
劉穎鏇
穎鏇依家只係21歲卜卜脆，素顏當然冇問題，加上佢熱愛行山、踩單車、游水等戶外活動，曬得一身古銅色肌膚，好有健康味道。
鄺潔楹
鄺潔楹同穎鏇啱啱相反，佢細細粒、白雪雪，之前佢試過喺直播度素顏出鏡，當時已經被唔少男網民大讚好索。
朱千雪
朱千雪依家讀緊法學專業證書，仲要讀多年幾，最快2020年先會正式拍返劇，要見到佢只可以喺instagram或者街上咁啱撞到佢喇。對於自己個樣，千雪bb非常有信心，成日冇化妝公開俾人睇，至於靚唔靚唔使我講啦！
張秀文
張秀文冇化妝個樣又幾純品，睇嚟佢平時出鏡可以就咁上唇膏都得！
孫慧雪
生過bb嘅雪雪真係靚媽一名，仲記得佢生完嗰刻即時影相放上instagram，簡直覺得佢係全個娛樂圈最靚嘅星媽。
傅嘉莉
佢擁有德國血統，初出道已經被網民話同李嘉誠老婆徐子淇相似，被媒體稱爲「翻版徐子淇」，你又覺得佢素顏點呢？
梁嘉琪
嘉琪雖然喺《學是學非》裡面比較少觀眾留意到，不過演藝生涯裡面大多數飾演可憐少女嘅佢素顏一樣好溫柔、斯文。