謝安琪（Kay）、容祖兒、盧廣仲、張敬軒等昨晚出席音樂平台舉辦的音樂會，Kay表演時不幸遇上耳機失靈，鏡頭下的她不斷向工作人員示意，可惜似乎仍然未有改善，最終獻唱時有點拍子不對，而且歌聲有點飄忽。由於音樂平台在網上進行直播，不少網友即時留言指Kay唱歌失準，雖然耳機有問題，但應該要表演專業，而支持Kay的人則認為是音響影響，跟Kay本人表現無關，在這樣惡劣的情況下仍能完成演出，已經非常不錯！而持不同意見的網民罵戰不斷，有指音樂會刻意抬高壓軸出場的容祖兒而貶低Kay，令雙方對罵不停升溫。
謝安琪演唱時不停用手調較耳機，可惜未能挽救演出。(網上圖片)
受耳機影響演出，謝安琪的心情明顯低落。(網上圖片)
部分留言如下：
「耳機有問題真係好難唱得好，普通係（喺）台下觀眾聽慣有歌手唱既（嘅）歌以為點解唔可以就咁聽現場既（嘅）音樂咁唱，但有上個台唱就知根本無可能好清楚咁聽到樂器聲，啊（阿）Kay 首羅生門無嚴重甩beat已經還神！」
「問題係唱咁多年都未識執生，耳機有事邊個歌手未試過，但炒到咁都少見, 佢燥底仲要將個情緒唱埋入首歌。」
「現場睇係災難級，就算係無ear mon，最多甩beat，佢係走哂音又唔夠氣喎！」
「現場睇除左（咗)走左（咗)粒大音，都唔算好大問題，好好聽就一定唔係，坦白講，容祖兒舞台表現真係高好多皮。」
「擺明意外，咁都要拎黎(嚟)同其他歌手比較表現。」
Kay完騷後接受傳媒訪問時都解釋原本的耳機已經沒有聲音，後來換過另一對，結果一上台再次沒聲音，又不時收到干擾的聲音，她說：「我從來都未試過在台上如此無助和徬徨，多得靠Supper Moment嘅主音Sunny行到好近，我望實Sunny個嘴唇先知自己唱到去邊。」表演失準當然非常不開心，又撞正今日是Kay的42歲生日，絕對是生日的「大驚喜」，她留言說：「孤躪跚獨挺，誰如影隨形，打落門牙和血吞，為表演者的責任。難得的慶生賀禮，彌足珍貴，受教，感謝由昨晚到現在以各種形式向我支持問候的每一位，流過的眼淚都熱䁔了。」而老公張繼聰即晚就寫長篇文章氹返Kay，非常有愛。
張繼聰留言說：「知道你為咗依個演出，花咗無數嘅心血去練習再練習，希望做到最好。可惜Live performance 永遠有無限嘅意外會發生，而今次發生嘅意外，係歌手最恐懼嘅一種...耳機失靈，Sub stage 冇台mon ,整個表演聽唔到自己把聲，聽唔到音樂聲...只係聽到耳機嘅沙沙聲，同觀眾席音響彈番嚟嘅聲（會展咁大，我估回音會唔止一浸），現場有幾千名觀眾，唔喺現場嘅更有數唔到咁多嘅觀眾.....依種情境（景），任何表演者發夢遇到都保証會嚇醒，不過，可惜，今次單嘢係堅嘅。依二十分鐘嘅痛苦，恐懼，㥬惶，心血白費...對表演者嚟講，係災難。災難係堅嘅，不過我認為你更堅，咁嘅環境，你仍然奮力完成整個演出，冇放棄任何一粒音任何一個小節。The Show Must Go On ，係一個表演者嘅專業。個騷你唔止go on ,仲充滿勇氣咁完成。同埋，如果唔係經過咁充足嘅練習，一定冇可能做到，一定冇可能。大佬，聽唔到聲照唱，部琴冇聲照彈，聽唔到音樂數唔到拍子照入歌喎，真係靠心中有劍。長篇大論，唔係因為我哋嘅關係，而係大家都係表演者，所以好明白你經歷咗咩。意外冇人想嘅，不過你好叻，有d叻係要係危困當中先會展現出嚟。同埋今次之後，可以更加膽生毛啦，上到台冇嘢驚㗎啦！經歷係用嚟強化自己嘅 。312，個宇宙預早送依份禮物俾你，等你再Level Up ,算係咁啦！最後最後，Happy Birthday My Lady 313 。」
張繼聰長篇大論留言表示太太能夠臨場應變，已經係非常之好。(圖片：張繼聰IG)