帶年邁母睇病急拎報告 逆子大罵：唔好死喺屋企

百行以孝為先，別待失去時才後悔。診所護士「珍寶豬」在其Facebook專頁「診所低能奇觀」發帖，指日前有一名男子帶年邁母親到診所看病，期間男子極不耐煩，希望能盡早拿到報告，並向母親大罵道：「你死還死呀！唔好死喺屋企呀！」

登記時呼喝母親

「珍寶豬」在帖文中表示，兩母子到達診所後，婆婆扶著柺仗慢慢行去坐下，男子便到登記處，「先生：『我阿媽要填呢份表，仲話要照肺』我：『好呀，麻煩你俾佢嘅身分證明文件我做登記啊』先生擰轉頭嗌過去：『喂，身份證呀！』婆婆慢慢摷身份證，先生唔耐煩行埋去：『搵張身分證都咁耐，你阻住人呀！』我：『唔緊要呀，唔急呀，慢慢呀』先生擰轉頭同我講：『係我急呀！』好大嘅官威啊！我收聲～」

追問報告幾時出

當珍寶豬開始替婆婆登記時，男子極不耐煩，除了詢問「要搞幾耐呀」外，又追問幾時可以拿到母親的報告；當他聽到起碼需時3至4日後，他即問：「一份報告要等幾日？」雖然珍寶豬一度解釋，但男子仍稱：「打幾隻字都咁耐？就咁話冇事咋喎唔係咩？」珍寶豬只好再解釋：「咁佢哋（醫生）唔係淨係得一份報告要出㗎嘛！」

大罵母親：唔好死喺屋企

此時，婆婆見到兒子的反應後，終按捺不住：

婆婆開聲：「你急咩呀？我都就死㗎啦！等幾日你都等唔到啊？」
先生擰轉頭回應：「你死還死呀！唔好死喺屋企呀！你過到去先好死呀！」
…呢個係咩對話啊…
婆婆：「你就咁我驚死喺屋企呀？」
先生：「間屋仲要賣㗎！你死都死出去啦！」
婆婆抿抿嘴：「係囉係囉，屋呀？你老豆走嗰時你話會照顧我，佢先肯寫你名呀！」
先生：「我而家冇照顧你呀？我有畀飯你食有俾衫你著呀！我係叫你唔好死喺屋企，死出去啫！你死喺度個價會冧㗎！定係你要我賣埋個老婆去補你死喺屋企條數呀？幾廿歲人用吓個腦啦！」
婆婆唔出聲了。

網民：他朝君體也相同

此事引來網民熱議，不少人表示嘩然，認為男事主十分不孝，「他朝君體也相同」、「天打雷劈」、「人在做，天在看」、「好恐佈 點解會有啲咁無良心嘅人」、「我爸爸都係屋企仙遊嘅，間屋都無係凶宅啦。呢個仔咁對阿媽，佢第日都會有咁樣嘅晚年受返」、「婆婆講嘅說話令人聽到心酸」、「今時今日錢先係要來孝順，父母都要企埋一邊」、「仲要話賣老婆！唔通老婆又得罪佢呀」。另有網民表示：「其實百年歸老，真係會影響間屋個價？其實呢啲係福氣。究竟係呢個扭曲社會扭曲埋個道德價值觀，定呢位先生天生就咁扭曲？其實阿媽係阿爸個遺囑、照計佢先係真正嘅屋主，忤逆仔！」

不過，亦有網民認為「清官難審家庭事」，「凡事有因果，你唔知人地阿媽以前點教仔」、「其實我哋又唔知阿婆以前點樣教仔，或者同佢哋本來就好大仇口呢」。