90後小編成日翻睇周星馳電影,第一次見到單立文(豹哥)呢個人係喺電影《賭俠》入面飾演與劉德華、周星馳敵對嘅大奸角。當時都只係知道佢叫「侯賽因」,當年嘅佢蓄長頭髮,紮住馬尾,輪廓深邃,靚仔到令人眼前一亮。佢散發住一陣放蕩不羈嘅Bad Boy味道,奸到出汁嘅笑容,就好似佢永遠對住你笑咁,笑到你心都寒埋。
「想偷我雞?」(電影《賭俠》截圖)
全盛時期嘅豹哥同金城武同框都一樣咁耀眼。(電影《沉默的姑娘》截圖)
不過又有邊個估到呢個形象竟然近年嚟個大逆轉,2013年豹哥喺《熟男有惑》入面Cosplay侯賽因。識得笑,其實好好笑。
《熟男有惑》
呢個變化,連豹哥本人都覺得驚奇:「呢個角色已經唔再乞人憎、唔再可怕,而係變咗可愛嘅角色。」不過佢同時覺得有啲欷歔,認為係電影業嘅衰退,再創造唔出一啲經典嘅角色。
不過豹哥最經典嘅代表作莫過於7次出演西門慶,佢自己就話好欣賞西門慶嘅自我,唔抑壓、想做乜就做乜。現實中嘅佢喺低潮期都有過一排頹靡嘅生活,打麻雀,去好多Rave Party,覺得大有大使、細有細使:「嗰時都幾開心,放縱吓自己、放鬆吓自己,唔做嘢住、沉澱吓。」不過豹哥坦言7演西門慶後都怕被定形:「依家無人話『呢個西門慶、鹹濕佬!』,喺光與影嘅電影、電視平台,係足以令到你之前嘅角色褪色,而新一個形象顯現,呢樣係好神奇!」
{{hket:inline-image name="50047065_355426765290635_8134183779485058500_n.jpg"}}{{/hket:inline-image}}
(單立文IG)
{{hket:inline-image name="41737653_686859391697898_3707654580042451735_n.jpg"}}{{/hket:inline-image}}
(單立文IG)
以前做極都係做奸角,正正係處境劇《愛·回家之開心速遞》叔公角色令到豹哥入屋「洗底」。不過對豹哥嚟講係一個挑戰:「呢個係好regular、好堅持嘅工作。每日七點起身,夜晚七、八點收廠,三百六十五日唔可以休息,睇你個人嘅紀律係keep到幾犀利。抱住戰戰兢兢心態去探索,但拍落,瀨嘢!」豹哥話自己以前係凌晨三、四點瞓,最高峰期係晏晝瞓覺、夜晚十二點起身,作息要三百六十度扭轉,幸好佢依家已經習慣咗。
不過一切都係值得嘅,豹哥搞笑形容依家佢隨時按任何一個單位門鐘,話想嚟食飯,佢相信都會畀佢入去。仲話以前有啲小朋友驚佢,變到依家衝過嚟攬住佢。
《愛·回家之開心速遞》至今已經拍咗兩年有多,豹哥話賺到嘅係一班「屋企人」:「一班演員日久生情,由好陌生、大家冇乜默契,變咗真係好似一家人咁,呢下幾攞命、幾珍貴。」,豹哥話以前拍戲、拍劇都係三、兩個月:「依家一班人日日見面,叫阿哥、大妹、細妹,叫到真嘅一樣,好似家人咁關心佢哋,放假問出唔出嚟食飯、病痛噓寒問暖,自己屋企人有時都好似無咁親。」