64歲金燕玲自揭患子宮癌 「最唔想個女知道」

金燕玲今日喺商台接受蘇施黃訪問時，透露喺今年初發現患有子宮頸癌。佢表示做例行身體檢查時，驗出子宮位置有癌細胞嘅活躍指數，醫生話佢有9成機會可能係患癌，不過確實情況就要做刮宮進一步了解，但由於金燕玲嘅子宮頸過窄，唔能夠成功進行刮宮手術。金燕玲後來入醫院，接受全身麻醉，做內窺鏡檢查。金燕玲得知患病後落淚：「過年前我流住眼淚染白頭髮，咁都要過年㗎！就算病，個樣都要好睇啲。」仲話自己唔敢畀囡囡Emma同妹妹知道：「最初得阿蘇同我最好朋友關之琳知，我最唔想個女知，因為佢一定喊喊喊，好擔心我，我就仲擔心，咁會令我情緒好波動。」

{{hket:inline-image name="888.jpg"}}{{/hket:inline-image}}

金燕玲又指，雖然係第1期，但因為腫瘤太惡，所以做唔到微創手術，一定要一次過切除淋巴、子宮和盲腸。金燕玲初五接受割除手術，進行手術時，醫生發現佢「好好彩」，金燕玲：「原來我唔只係子宮頸有事，個腫瘤仲『食』咗入子宮內壁。」完成手術後，金燕玲先同屋企人講，仲話︰「因為開刀好弱，我又要作狀，成日同個女視像，佢問點解我成日咁早瞓。」另外，金燕玲做完手術後開始接受化療，一共需要做六次，每三星期做一次。化療期間，金燕玲不但作嘔，連嗅覺同味覺都出現奇怪感覺。不過，事隔一個月，今日戴住口罩上到電台做訪問，感覺精神不錯，希望金燕玲能夠早日完全康復。

{{hket:inline-image name="33.jpeg"}}{{/hket:inline-image}}