繼蘇凌峰後另一傳奇主播 「新聞才女」葉雅媛紅霸80年代

由方東昇主持嘅《長命百二歲II》近日已經播完，最後一集請嚟80年代著名新聞男神蘇凌峰，節目播岀後勾起唔少市民嘅集體回憶，憶起舊時新聞從業員嘅風采。講到80年代新聞業另一個傳奇人物，不得不提葉雅媛，佢係史上第一位新聞女主播，又被市民封為「新聞才女」，你哋又知唔知佢嘅威水史呢？

{{hket:inline-image name="1506168007_ce4b.jpg"}}{{/hket:inline-image}}

(網上圖片)

葉雅媛係中文大學新聞系嘅第一屆學生，畢業後入咗TVB，成為首位無綫新聞女新聞報導員，80年代經常擔任《六點半新聞報道》主播，亦有份主持新聞透視。因樣子標致，報道新聞淡定又大方，當上女主播後好快就成功「入屋」，深受市民喜愛，更被譽為「新聞才女」，受歡迎程度同而家嘅「新聞小花」相比，真係有過之而無不及！

{{hket:inline-image name="TUNGSTAR2005069.jpg"}}{{/hket:inline-image}}

(東星娛樂)

亦因為咁，葉雅媛不乏裙下之臣，曾有男觀眾手持玫瑰花喺電視台外等佢下班，搞到佢要躲藏到採訪車入面。葉雅媛有好多追求者，佢最後選擇咗同著名建築師徐憲輝結婚，老公嘅家族經營名牌食肆「太平館」，二人育有一子一女。葉雅媛婚後專心相夫教子，早於1987年離職新聞主播，只偶然出席公開活動，生活非常低調。

{{hket:inline-image name="70ec4799jw1fbktxjzb7jj20yd0qoafb.jpg"}}{{/hket:inline-image}}

(劉培基微博圖片)

葉雅媛同徐憲輝呢段婚姻，當時令好多人艷羡，覺得佢哋郎才女貌，一個新聞主播，另一個係建築師，非常合襯。可惜美滿婚姻亦因第三者介入而破裂。徐憲輝同一名上海女人發生婚外情，葉雅媛知道後忍受唔到有第三者嘅岀現，就算年過50歲，佢都無所畏懼，非常灑脫地選擇離婚。回復單身都可以好精彩，葉雅媛放下已成過去式嘅關係，積極面對人生下半場，佢專注於做義工同慈善工作，得閒又約下三五知己，如徐小鳳、趙雅芝同劉培基等人聚會，絕對係話比各位女士知，一個人都可以活得好自在！

{{hket:inline-image name="bac150e5jw1ewpkbn1e02j213e186146.jpg"}}{{/hket:inline-image}}

(劉培基微博圖片)

儘管葉雅媛淡岀新聞界多年，但其實佢一直好關心香港新聞業嘅發展，早幾年接受TVB節目《新聞話事．人》訪問，感嘆傳媒嘅水平好似不斷下降，言語間有點晞噓：「以前我哋新聞記者行岀去，會感覺到啲人好尊重你，但而家新嘅記者行岀去做嘢，啲人會走都走唔切，大家真係要反省一下，點解會有咁嘅情況岀現？」葉雅媛仲話：「其實有好多記者都好用心、好專業咁報導新聞，希望大家會欣賞佢哋嘅付出！」

{{hket:inline-image name="tttttt.jpg"}}{{/hket:inline-image}}

(《新聞話事．人》影片截圖)