唔係人人一出世就天生麗質，不過好多女人相信一白遮三醜，所以由中國戰國時代開始，女人已經識化妝去博得異性好感。就算嫁咗俾人都唔可以鬆懈，因為要同其他女人共待一個老公，要保持花容月貌先可以突圍而出。直至現代，女藝人都係好依賴化妝，除咗工作需要，靠濃妝放大表情之外，平時出門都要化，因為喺歲月磨滅下難免會有衰老的徵狀，為免被記者偷影到，佢哋都紛紛化妝遮蓋臉上皺紋同瑕疵。結果女藝人嘅臉上總係化上完美妝容，保持最佳一面示人，佢哋嘅素顏就變得好神秘。不過為咗拉近粉絲同自己嘅距離，不少女藝人主動大曬素顏，以天生好膚質、濃眉大眼暗示自己真係美人胚子。例如以下有唔少TVB女藝人就將一層層嘅化妝品卸走，敢於公開裸肌。
楊卓娜
《愛回家》霞姐楊卓娜喺冇濾鏡、冇化妝、冇修圖，「三無」嘅情況俾大家欣賞，41歲嘅佢靚到被網民激讚：「完全唔似4字頭嘅媽媽！」、「呢幅相好似90後」等等。
李彩華
冇化妝嘅佢眼耳口鼻都喺齊度，因為本身輪廓靚、雙眼皮深、眉毛濃密、冇黑眼圈、皮膚好，其實素顏仲靚喎！唔怪之得佢都自爆未喺大陸發展之前，舊老闆曾經要求佢做情人提供性服務，好在佢拒絕咗同堅決解約。
賴慰玲
出身於舞台劇女主角嘅賴慰玲生完bb好似冇生過咁，樣同身材都回復到初出道咁靚，希望佢快啲返嚟TVB拍劇俾多啲作品我哋睇！
陳凱琳
陳凱琳同樣係靚媽媽，生完好似仲靚過之前咁，搞到田蕊妮都忍唔住問係咪真係有生過！太唔科學！可能本身輪廓深，食極唔肥啦。
黃君馨
之前黃君馨好勇敢地將素顏放喺instagram同大家分享，雖然網民笑佢面色太暗沉，又話黑眼圈太大，不過黃君馨唔介悔，佢只係想話俾大家聽女人要有自信美。
簡淑兒
簡兒外表青春可人，你話佢10幾歲我都信，所以素顏更加無敵。
蔡思貝
最估唔到蔡思貝唔化妝原來幾靚，個人清秀、乾淨，仲順眼過拍劇嘅造型，唔通平時得罪咗造型師？
馮盈盈
馮盈盈以前係無眉娘，不過皮膚好好，所以係咁意加咗條眉就當堂靚返喇。
黃智雯
Mandy真係好靚！就算素顏都係靚，完全睇唔出佢真實年齡已經36歲呀。不過佢2007年參加過香港小姐競選，仲入圍最後五強，唔靚就假喇。
黃心穎
好多人都話心穎落咗妝好似草蜢嘅蔡一智，就算住咁佢自己都唔介意公開素顏俾大家笑吓，好大方！
胡定欣
基於佢紋咗眉嘅關係，所以冇一張係真正素顏，不過胡定欣冇化妝都係幾靚嘅，反而上咗妝仲覺得太濃添。
陳庭欣
Toby貴為2010年度香港小姐競選冠軍，面試嗰陣早就要用素顏見評判，當然有返咁上下。
蔣家旻
家旻仲可以扮到學生妹，就知道佢唔化妝教係咁青春迫人啦。
楊怡
以前已經有好多人讚楊怡靚女，去到依家雖然淡出幕前，但佢素顏都仲好正，同相差5年嘅老公羅仲謙好襯。
陳偉琪
冇化妝嘅Vicky雙眼皮冇咁深，而且眼距有啲大，所以平時多數靠痴假眼睫毛撐返起對眼。
湯洛雯
叫得做靚湯，梗係靚啦。前排仲被傳媒大讚成個湯氏家族都遺傳咗優良基因，個個靚仔靚女！
李施嬅
同好姊妹胡定欣一樣，施嬅冇化妝同化咗妝冇乜分別，其實不如話唔係好分得出。
姚子羚
成日被網民笑對眼好細，改成「表哥圖」嘅子羚都係化咗妝索啲，加強咗對眼先嫵媚啲。