講起江華(原名：陳木華)大家會諗起咩作品？唐三藏、項羽、嫪毐、雍正皇帝...雖然入行35年之間產量唔多，不過佢貴精不貴多，只要佢一做主角，每套都會變成經典，長留觀眾心中。全因為佢好有演藝天份，忠嘅、奸嘅、貴族、粗人都可以完美駕馭，基本上做咩角色都難佢唔到，係好多網民、觀眾心中嘅男神。不過自2013年演完《鳳舞香羅》之後，江華就淡出幕前，轉行做保險，仲一度遇上情緒的低谷，好大壓力。就算藝人朋友紛紛邀請佢回巢拍劇，佢都拒絕。當初點解會喺事業高峰期淡出，之後又點解係都唔肯復出？事隔多年，江華好罕有咁現身解釋，仲話：「我情願街邊做小販賣花生」！
自爆淡出幕前真正原因 詳述對復出睇法
有人話江華因為TVB棄將心酸先走，有人話佢遇唔到好嘅角色，對於淡出幕前嘅真正原因，江華話佢對自己太高要求，搞到好大壓力：「點解做乜似乜？我唔係演，我將自己變為嗰個電視劇角色。點抽返出嚟？唔得㗎，死人㗎唔得㗎！所以我咪唔拍戲囉！做一個演員好危險，係真係好危險，次次都好辛苦，所以啲人好難理解，佢哋會覺得：『點解你唔做戲？』唔得呀，叫我求其去做又唔得，叫我去做又好辛苦。當我做會全程去做，當我唔做會全程抽身，我唔會留戀，但你問我鍾唔鍾意，我鍾意嘅。」回想以前喺TVB拍戲嘅時光，江華話佢最欣賞2個人，一個係秋官，一個係劉松仁：「多謝秋官，同佢拍劇算係有交代，佢係最適合做古裝嘅演員；同松哥係喺《無業流民》合作，好鍾意、好欣賞佢嘅演技。同到呢兩個演員合作，無憾！」
(TVB電視截圖)
(TVB電視截圖)
以為江華休息咗一陣就會返嚟，話晒佢都講到明鍾意做戲，咁點解咁多網民、觀眾、藝人朋友要求佢復出，又堅持唔做呢？江華就話佢冇放棄過做演員，但亦冇強求一定要出返嚟拍劇，不過佢睇化咗，覺得人生搵錢唔係最重要，一切都係睇緣份：「喺演藝界係冇人承認江華呢個人㗎，係觀眾承認㗎咋。江華係冇票房，江華係冇價值。我唔覺得自己優秀，好多人認為搵到錢好成功，其實唔係㗎！道理唔喺度，幾多搵到錢嘅人不擇手段、唔開心，自己傷，別人又傷，何苦呢？所以唔使妒忌人，係會成就會成，唔成就唔成，唔好夾硬嚟。依家我冇放棄拍戲，但又唔強求。睇吓值唔值得（復出），當我覺得值得就去做！有條件係幫有需要嘅人。」
不過對於自己嘅執著，江華話辛苦晒結咗婚27年嘅老婆麥潔文：「我唔搏，乜都唔搏，搏咩啫？唔好傻啦！好似我個仔咁講，發達好似好不切實際。老婆嫁著我捱世界，人哋話咸魚白菜都好好味，同我一齊就咸魚白菜都唔好味嘅。因為我對自己太有原則同要求，我情願街邊做小販賣花生，都唔想隨便做演員，有幾多人懂我吖！」雖然江華咁講，但麥潔文聽到喺隔離甜笑，又繼續幫做緊專訪嘅老公影相，睇嚟麥潔文一啲都唔覺得辛苦，仲好幸福添！
回顧江華輝煌演藝路
回顧江華喺TVB裡面嘅15套劇集，最令人深刻應該係《西遊記》中嘅唐三藏，佢本人都話為咗鑽研角色，研究咗唔少佛偈。劇中嘅佢係個好認真咁搞笑嘅冷面笑匠，原來當年拍《西遊記》時佢會同張衞健爆肚講對白，張衛健話過如果江華接唔到下一句，就會走埋一邊狂念阿彌陀佛，任何時候都要慈悲為懷。而麥包就會扮不知所措，4個人非常合拍，令《西遊記》成為TVB數一數二嘅神怪劇之一。
(TVB電視截圖)
(TVB電視截圖)
超時空劇集《尋秦記》都有江華份，佢係最陰險嘅大反派，由心狠手辣嘅劍客連晉搶和氏璧，到扮成嫪毒喜怒不形於色，為呂不韋謀朝篡位，係唯一可以同主角匹敵智商嘅角色。有網民就話：「靚仔唔在講，現代古裝劇皆宜， 你要佢扮型又得、搞笑又得，就算佢唔係主角，佢都可以好搶鏡，但你又唔會覺得佢霸道。最難得佢係好有英氣，有一段時間，《尋秦記》連晉我覺得佢仲型過項少龍。」
(TVB電視截圖)
《無業樓民》嘅凌希斯又係一個經典角色，江華將把花花公子嘅輕挑神態同性格演活出嚟，表情好抵死。
(TVB電視截圖)
然後江華又成日飾演皇帝或君主角色，尤其佢喺後期《九五至尊》飾演流落現代香港嘅雍正皇帝（李大蝦），同《楚漢驕雄》中飾演項羽。明明兩套劇都係高高在上，但佢可以演到兩種截然不同嘅感覺，前者搞笑、唔正經，後者就好有霸氣。
(TVB電視截圖)
所以江華真係天生食呢一行飯㗎，唔做演員嘥晒，希望佢會遇到一個好劇本，返嚟俾我哋一班粉絲再次欣賞到佢嘅演技啦！