藝人張達倫早年以《愛回家》「嚴謹」一角成功入屋，近期於TVB熱播劇集《大帥哥》亦有份岀演，佢最近同太太Kimmy一齊上由車婉婉嘅節目《1+1+1》，分享跟太太相戀點滴，連車婉婉聽完都超感動。
（TVB電視截圖）
張達倫喺讀書時期已經認識Kimmy，算係青梅竹馬，但係當時二人冇一齊，各自有伴侶，Kimmy後來更同咗個外國人結婚10年，有一個囡囡Chloe。其後張達倫同Kimmy各自同當時另一半分手，二人喺一次聚會撞返大家，頓時覺得「有感覺」，張達倫仲話：「嗰時佢梳著個平頭，我就我心諗呢個女仔都幾大膽，有勇氣剪到咁短。」加上佢地都鍾意行山，自自然然就一齊咗。張達倫同Kimmy於2016年結婚，二人婚後育有一子張凱碩，以及Kimmy同前夫所生嘅15歲繼女Chloe，一家人四口生活幸福。
(張達倫IG圖片)
愛屋及烏 視繼女為己岀
要做爸爸本身已經唔容易，而且要學習做「繼父」呢個角色更加唔係人人都可以勝任，但張達倫就以「繼父」同「朋友」嘅身份去同繼女Chloe接觸，佢喺節目度講：「我永遠都當Chloe係自己個女，我唔覺得有咩大問題，我都係一樣咁錫佢。因為Chloe係Kimmy生命入面嘅一部分，如果我接受唔到，我有咩資格愛呢個女人呢？」聽到呢度，車婉婉表情都超級感動，仲話完全感受到張達倫對太太無條件嘅愛。
（TVB電視截圖）
（TVB電視截圖）
之後張達倫又分享同繼女相處心得：「我哋關係十分之好，我同佢好似朋友，我都大唔透。喺呢個時代唔可以再用長輩同後輩之分，小朋友唔會想同你溝通，佢哋已經成日對住部電話，你再『敦』起個款佢哋睬你都傻啦，所以我同佢會保持朋友關係。」
（TVB電視截圖）
錫老婆願畀成副身家佢
張達倫對繼女好，對太太更係鍚到燶，之前Kimmy為佢生下囝囝Zachary，佢開心到不得了，仲感嘆做媽媽好偉大，要經歷生子之痛好辛苦，所以冧爆同老婆講願意畀曬成副身家佢：「佢送咗個仔畀我，所以我送會晒所有嘢畀佢，以後我搵到嘅所有同錢都送晒畀佢。見到呢個生產過程覺得媽咪好偉大，男人真係做唔到，太辛苦啦。」
（TVB電視截圖）
盼繼女孝順媽咪
睇完今期《1+1+1》節目，有唔少網民封張達倫做「暖男」，仲大讚佢地一家感情深厚溫馨，《晴報》搵嚟張達倫作岀回應，佢話：「多謝網民封我做『暖男』先，Chloe睇完節目相信都『在心中』，雖然佢無特別表現岀嚟，不過最希望係佢孝順媽咪，咁就足夠㗎啦！」