惡客無撳鐘過站遷怒車長 雙方互毆車長骨裂送院

大埔汀角路救恩書院巴士站今早9時半左右發生打鬥事件，一名男子疑因忘記撳鐘落車，要求車長停車開門不果後，兩人發生爭吵，繼而互毆。兩人由車上打到落車，車長更被推跌坐在地上。車上多名乘客報警，警員到場調查後，以涉嫌在公眾地方打架將2人拘捕。

{{hket:inline-image name="bus200220191.jpg"}}{{/hket:inline-image}}

據了解，涉事男乘客姓黃（56歲），車長姓吳（40歲）。目擊的文小姐在Facebook群組「Tai Po 大埔」表示，自己「第一次見人街頭開拖」。事發時，黃男大叫「落車」請車長開門，吳男反問為何不撳鐘；黃男回應自己「已經企咗喺門口」，吳男反指「咁咪撳鐘囉」。文小姐續指，黃男堅稱自己已揚聲通知下車，落車後仍繼續唸唸有詞。其後，吳男下車，「司機一落車理論就同佢打到扭埋一舊，嚇到全車人衝落車分開佢地。」事件中黃男手指受傷，吳男則左腳骨裂及面部受傷，由救護車送院治療。

{{hket:inline-image name="bus200220193.jpg"}}{{/hket:inline-image}}

文小姐接受《晴報》訪問時進一步指出，事發時巴士正在埋站，黃男被吳男反問為何不撳鐘後情緒激動，「佢挑起先嘅，但個司機都有還火」。隨後，黃男大罵吳男時夾雜不少粗口，「咁個司機就鬧返佢囉......但係個乘客（用粗口）鬧咩佢，先用同一句回返佢咁囉」。她續指，兩人其後大打出手，但吳男明顯「唔夠打」，被黃男「撳住打」；其他乘客感到驚訝，紛紛衝落車將二人分開。她直言，自己當時都被「嚇親」，「因為諗住司機會走，但無諗過佢會突然落車」。事件前後擾攘15至30分鐘，她最終搭下一班車離去。