鄧一君為女兒創業做老闆 $68一碗鮑魚車仔麵

提起鄧一君，最令大家記憶深刻一定係電影《記得...香蕉成熟時》嘅「香蕉仔」一角，仲有同古天樂係好兄弟，不過鄧一君演藝事業唔似得老友古天樂咁順利，因為生得童顏戲路反而受限，好多時都係做某人細佬、某某年輕版，「當時紅咗有好多機會，但自己冇去好好把握，加上我外形太局限，而且我唔鍾意應酬，又要去卡拉OK、飲嘢，佢哋搵親我又唔出，又掃興，就算岀去都係早走。」2003年沙士係鄧一君最難捱嘅時候，全年都無收入，仲需要賣車來維持生活費，於是佢把心一橫就離開娛樂圈，轉行投入保險業，一切都要從頭開始，真係好唔容易！

{{hket:inline-image name="01ec1p3.jpg"}}{{/hket:inline-image}}

報課程努力裝備自己

鄧一君加入咗保險界，為咗事業更報讀相關課程裝備好自己，佢話：「我發覺我真係開咗竅，我𠵱家做管理，有啲管理嘅技巧唔夠，咁就自己去進修工商管理，讀咗個master，而最厲害係呢個『CFP認可財務策劃師』，全香港得三、四千個人有。」鄧一君仲要決絕得就算有戲癮都唔會再拍戲，因為擔心客戶覺得佢工作唔專業，既刻苦又專注，唔怪得佢好快就升職做分行經理，真係好叻仔！

{{hket:inline-image name="ggggggggggggggggggg.jpg"}}{{/hket:inline-image}}

創業做老闆開車仔麵店

可能係唔做演員好耐，鄧一君又無刻意保持身材，外形比以前敦厚咗好多，鍾意食嘅佢最近又有新搞作，再次榮升做老闆，於油麻地開「一君士多」車仔麵店。「一君士多」特別以日本屋台為靈感，以木製餸車，配合紅門簾，塑造日系風格，鄧一君仲話：「希望可以改變車仔麵嘅傳統形象，將日本拉麵嘅美食體驗配合車仔麵，帶嚟唔一樣嘅滋味。」

{{hket:inline-image name="ssssssssssssssssssss.jpg"}}{{/hket:inline-image}}

為愛女開車仔麵店

至於點解萌生開車仔麵店想法，原來鄧一君係為咗女兒：「自從我生咗個女，個女而家都10歲喇，佢由細到大好鍾意食嘢，我一見到佢食嘢個樣好開心呢，我就覺得：『啊！如果有機會嘅話呢，我都好想搞一個小食店，然後可以俾個女有多啲好嘢食。』所以有少少靈感都係嚟自個女。」

{{hket:inline-image name="ttttttttttttt.jpg"}}{{/hket:inline-image}}

$68有大大隻鮑魚食

新春期間「一君士多」仲特意推出兩款代表「豪華」、「富貴」的車仔麵。「富貴車仔麵」只需$68，寓意「食得富貴」，餸料有三隻鮑魚同兩片花膠，另一款寓意「食得夠」嘅「蠔食車仔麵」，只需要$58，用咗特選日本廣島蠔，配合花菇，味道惹味。

{{hket:inline-image name="ddddddddddddddddddddddd.jpg"}}{{/hket:inline-image}}