年三十晚搶上頭炷香  黃夏蕙變身迎豬年

黃夏蕙每逢年三十晚，都會去黃大仙祠上頭炷香。年年都悉心打扮，以獨特造型示人嘅佢，今年為迎接豬年，著咗紅色短袖上衣、粉紅色工人褲，仲帶埋個塑膠豬耳、豬鼻到埸，相當搶鏡。

{{hket:inline-image name="b405a3fc-1efc-4d4c-8502-7685bbd53df7.jpg"}}{{/hket:inline-image}}

夏蕙姨話，豬年願望係世界和平，接住就提到政府最近收緊長者綜援申領資格一事，夏蕙姨話：「60歲派（綜援金）都已經好遲，依家仲要老人家等到65歲，不如唔好派！」因此希望政府可以體恤民情，照顧長者嘅需要。佢又表示：「後生仔有氣有力，仲可以捱，但好多老人家已經無能力工作，政府應該派多啲錢畀佢哋，老實講，佢哋食得幾多年！」

此外，夏蕙姨又透露自己一直都想開一間老人院，今年終於得償所願，好開心！嚟緊自己旗下嘅慈善基金，將會舉辦一啲大型籌款活動，盡力籌得更多款項，去幫助經營老人院，造福長者。至於老人院選址方面，佢就話香港租金實在太貴，仍未決定，希望一切順順利利。