父母遺棄輟學養妹妹 Hana菊梓喬患抑鬱險死

Hana菊梓喬入行短短兩年，就勇奪勁歌《最受歡迎女歌手》，由於其所屬的星夢娛樂，是TVB旗下公司，根據娛樂圈慣例，當然難逃造馬疑雲，不過嘈得最勁嘅竟然唔係網民，而係同公司嘅吳若希，希姐唔止在Hana得獎一刻，狂笑13秒被指擺明恥笑對方，更向傳媒坦言：「造畀佢都應該！」隨即鬧出連串是非，雖然Hana得獎惹來唔少負面流言，但佢喺IG嘅回應就盡顯大將之風：「今次攞到《最受歡迎女歌星》是一個僥倖」獲得不少網民留言支持。

{{hket:inline-image name="sx.jpg"}}{{/hket:inline-image}}

坎坷身世自嘲多餘

雖然Hana只係入行兩年就登上一線女歌手寶座，真係好似好僥倖，但實情佢一路走來，所吃的苦頭絕不比任何人少！原來Hana與妹妹自幼被父母遺棄，Hana 早於13歲已被逼輟學，在社工介紹下擔任美容院學徒，姐兼母職照顧細自己一年嘅妹妹，為賺多一點生活費，Hana更狂做各式兼職，期間受盡同事欺凌：「試過被人用粗口鬧我媽咪，都幾難聽幾侮辱。不過我無還擊對方，因為我打工只為份糧。」

自幼一直喜歡唱歌的Hana，要捱到妹妹中五畢業，才鼓起勇氣追夢，去台灣參加音樂比賽，誰知卻因演出未夠好，令Hana情緒受困患上抑鬱，一度遠走歐美等地流浪避世：「抑鬱最嚴重嗰時，我想死，覺得生存無晒意義，我由細到大都覺得自己好多餘，不過當我想到妹妹，我就記起自己生存意義，佢係我嘅心臟，我願意付出一切換佢嘅快樂。」在妹妹支持下，Hana回港繼續追尋音樂夢，於2016年終於入行、翌年加盟星夢，憑《手中沙》、《忘記我自己》等多首大熱電視劇歌曲成功入屋。如今Hana已名成利就，總算可為妹妹帶來美好生活。

{{hket:inline-image name="cs.jpg"}}{{/hket:inline-image}}