前幾日是三嫂戚美珍57歲生日，更是與三哥苗僑偉結婚29周年的大日子，三哥仲煙韌啜爆三嫂，大放閃光彈！不過在恩愛背後，29年的婚姻難免遇上風浪。三哥同三嫂都是TVB藝員訓練班出身，1982年兩人拍劇時撻著。在長達8年的愛情長跑中，經常鬧交、冷戰、鬧分手，三嫂甚至曾經衝口而出：「一世唔再愛苗僑偉」可幸分手多次的他們仍然深愛對方，最終在1990年拉埋天窗，婚後育有一女一子。三嫂更為了家庭淡出娛樂圈，一家四口幸福滿瀉。
包容三嫂港女一面
三哥比三嫂早一屆進入無綫，1982年二人在劇集《飛越十八層》合作，拍拍吓戲假情真擦出愛花。當時男方英氣迫人，女方就眼大大顏值高，如同神仙眷侶。拍拖多年一定會有不少拗撬，不過每次主動講分手之人竟然是三嫂，她甚至講過：「一世唔再愛苗僑偉」的誓言！三哥話三嫂性格相當刁蠻任性、火爆，經常執著於瑣碎事，百份百是個「港女」，直到結婚初期都常常鬧交，全靠他一一包容才可互相遷就到現在：「我哋兩個成日拗餐死，大家好唔睇好我哋。正因為咁由拍拖開始，『退一步海闊天空』已經印咗喺我腦海入面經常用到，我好容易消化，咁就好快過。我決心要將佢收服，所以每次分手後都會復合。拍拖嗰段日子就好似8年抗戰咁，好在三嫂其實好易氹。」
婚後專一為三嫂杜絕緋聞
就算對住三嫂這個港女，三哥次次例必先收火，並主動示好，果然是個情深又專一的好男人。不僅如此，愈來愈man的三哥於2017年為《新射鵰英雄傳》飾演五絕之一黃蓉的父親「東邪」黃藥師時，更獲兩岸三地網民譽為「最型黃藥師」，重新成為不少少女的偶像，三哥為免老婆擔心，大派定心丸：「拍戲會有靚女喺身邊，工作上會有接觸，太太做過演員會知道。拍完戲識得抽離角色，都咁大個人唔通咁都控制唔到咩，佢對我有信心。我太怕麻煩喇，亦唔花心，屋企要理嘅事已經唔少，唔會再喺出面自取麻煩！」，婚後專一杜絕緋聞，安份留在三嫂身邊，這麼好的老公在哪裡找呢？
無論三嫂肥或瘦都愛
三哥繼續型英帥靚正，但三嫂誕下囡囡苗彤和囝囝苗俊後，卻變得心廣體胖，發福不少，譚詠麟還封她做「何文田肥珍」。見住從前貌美如花的三嫂身形走樣，三哥卻毫不介意，表明會愛她一生一世：「每個人年紀都會大，樣貌會變，冇理由生完小朋友就丟咗佢。做男人要學識承擔，同你生活咁多年，唔可以半途拋棄佢。結婚時已經係一個承諾，我同太太經歷過好多風浪，一定照顧佢一生一世。」，嘩！咁識講嘢，難怪60歲仍然風靡萬千少女啦。現在三嫂身材苗條，變回美魔女級數，同三哥好襯啊！