三大美魔女罕見合體 邊個keep得最後生

近年娛樂圈湧現一批又一批美魔女，單睇外表，根本無可能估到佢哋幾多歲，好似近日劉嘉玲、周海媚同李若彤就喺內地碰頭，造就三大美魔女開心合照，之後佢哋仲喺社交網站share靚相，嘉玲姐話：「同時見到了兩個二十年沒見的朋友，感覺像昨天一樣，太神奇了！」咁就廿年，真係光陰似箭，至於李若彤就話：「女皇嘉玲姐。2019新朋友周海媚小姐」

相片一出，即時為大家帶來無盡那些年集體回憶，事關佢哋三位都係8、90年代最具代表性嘅女神，有唔少網民仲話單睇外表，好難分得出邊個後生啲，不過實際數字就話畀大家聽，劉嘉玲53歲，周海媚細啲啲52歲，至於李若彤由於從來無公開年齡秘密，所以大家只能估估吓，有報道話佢得45歲，亦有報道指佢其實已經51歲。不過就有網民指李若彤個髮型，加上佢一身毛毛衣著，感覺有啲似「夜總會女郎」喎，你哋又覺得似唔似？

女神不老秘密

相信大家都好好奇，點解佢哋好似食咗防腐劑，究竟佢哋有何不老秘密？

劉嘉玲

嘉玲姐話女人唔補好易老，不過佢嘅進補方式並非食山珍海味，只係飲番茄豬肝湯，事關佢話豬肝有清血排毒效果，所以經常以煲湯作為主要護膚美容餐，咁當然亦要配合充足睡眠與無時無刻補充充足水分，三者缺一不可。

周海媚

大家有無聽過「肌斷食」？呢個理論係由日本護膚專家宇津木龍一提出，顧名思義係停止使用護膚產品，皆因佢認為肌膚本身有自我修復能力。而海味嘅凍齡秘訣就係肌斷食，所以佢平時洗面後只會搽一點爽膚水就瞓，幾乎完全純天然。至於飲食方面，海味已經戒吃牛肉30年。

李若彤

同樣係肌斷食派嘅李若彤，護膚心得同樣簡單：「好多人問我保養心得，我嘅答案係飲白開水，啲人聽到之後都會好驚訝，但我20年嚟真係無飲其他嘢，朝朝都只係飲水。」除此之外，李若彤話要keep靚樣，運動當然少不了。

{{hket:inline-image name="d.jpg"}}{{/hket:inline-image}}

{{hket:inline-image name="rew.jpg"}}{{/hket:inline-image}}