自稱鬼妹仔性格的蔡思貝入行5年多，每次拍劇都會同男拍擋傳出緋聞，包括鄭俊弘、溫家偉、周志文、洪永城、王浩信、羅仲謙、張振朗等無一幸免被姣電。因為緋聞成本電話簿咁厚，冠絕電視城，令她有「人肉發電廠」稱號。今次拍《大帥哥》拍住前輩張衞健，結果又出事，事關有一幕探監戲，蔡思貝要講一段好長對白，點知頻頻NG，佢仲喺NG時飛撲熊抱張衞健，隨時惹來網民炮轟，大鬧佢唔知想搏乜。講真大帥哥另外兩位老婆譚凱琪同楊秀惠都憑呢套劇爆紅，唯獨蔡思貝被網民鬧爆，唔通真係咁邪？
借故攬張衞健 網民眼火爆
《大帥哥》最新一集講到張衞健被蒙大帥蔡國慶發現包庇日本間諜譚凱琪，不但革去大帥哥之職讓洪永城替代，更命令洪永城要將其困在監牢，3日後公開槍斃。由於張衞健一向毫無軍閥殘忍一面，愛民如子，所以眾人知道他將要被處決都想盡辦法想救他，其中一位就是沅婉蔡思貝。蔡思貝穿上裙掛，希望與張衞健在獄中拜堂成為真正夫婦：「你唔應承我嘅話，我就著住呢套裙掛上吊，做你嘅鬼新娘，你就算避我避到落18層地獄，我就兜落19層去攔截你，迫你上返17層。你再去到奈何橋，飲埋孟婆湯，我都會好似一條非洲大蟒蛇咁樣纏住你，你係走唔甩㗎喇，我係咪型到離晒地，勁到噴晒汁呀？」諗住學張衞健說服他結婚。
但講真，張衞健就話擅長講急口令式對白，設計到咁長咁快，對於外國讀書的蔡思貝未免太難，搞到她在拍攝時不斷NG。NG唔緊要，再嚟一take就可以，之不過蔡思貝NG時都會異常熱情地攬住張衞健，好多網民見到都眼火爆：「唔怪之得叫姣精，又唔見其他演員係咁？人哋講錯對白最多講句對唔住，張茜睇咗張衞健肯定跪榴槤！」、「佢姣人真心有一手，第一吓都算，挨晒身嗲人，第二吓攬埋落去，對波仲係咁向前，使唔使吖？」
張衞健表明同老婆互信大家
雖然蔡思貝施出凌厲攻勢，不過話晒張衞健同張茜相戀18年，一直保持住零緋聞的清白之身，對於跟女拍檔合作，佢有一套守則：「我有著波鞋（不導電）啊，不過對我嚟講最重要係self control (自制能力），你幾時見到我老婆跟出跟入？證明佢幾咁信我！我零緋聞喎大佬，零緋聞喎，我教各位男士，唔一定娛樂圈，各行各業要嘅男士做到零緋聞只有一個辦法，唔好搞，唔好搞咁多嘢！」有個咁信任自己嘅老婆，大家明點解佢哋結婚多年都一直咁恩愛啦！
▼睇返正式冇NG版，急口令真係幾快