57歲黃日華再扮郭靖 「賺人仔悲歌」

藝人北上掘金早已變成黃金定律，但正所謂受人錢財替人消災，有時人仔都唔係咁易賺架，好似近年就出現各式真人騷，要藝人出賣私隱，甚至放棄尊嚴，都真係幾惡啃！而最近黃日華又再北上賺人仔，雖然佢唔係做真人騷，只係出席活動，但大會竟然安排佢著住同36年前拍《射雕英雄傳》時一模一樣嘅戲服，57歲再扮郭靖，仲要擺出劇中各式甫士，使出降龍十八掌！雖然話華哥嘅郭靖係永恆經典，但咁法玩當然惹嚟網民劣評如潮：「佢咁著法同著校服有乜分別？有錢真係大晒？」、「呢啲咪就係賺人仔悲歌，佢要你做乜都得。」

肩負養家重擔

其實華哥都唔係第一次扮郭靖，但以往通常都係拉弓擺甫士就算，絕少好似今次全副武裝上陣。但大家唔好誤會佢只顧搵錢大過天，實情有苦自己知，事關自從2013年太太梁潔華傳出患上血病後，單係醫藥費每月要成10萬，接受了足足兩年化療先康復，以為一切雨過天青啦，點知去年又傳出血病復發，華哥為照顧老婆一度停工，幸而有指其後梁潔華成功進行骨髓移植，戰勝病魔！咁大個家庭重擔，大家明點解華哥乜都肯扮啦！

{{hket:inline-image name="y.jpg"}}{{/hket:inline-image}}

{{hket:inline-image name="trt.jpg"}}{{/hket:inline-image}}

{{hket:inline-image name="tr.jpg"}}{{/hket:inline-image}}

{{hket:inline-image name="ut.jpg"}}{{/hket:inline-image}}