自創無厘頭結局搏到盡 星爺：我寧願遺臭萬年

周星馳執導的大作《新喜劇之王》將於大年初一上映，不過近日宣傳片曝光後，即時被批得體無完膚，大鬧套戲炒冷飯，處處可見當年《喜劇之王》的影子，更有不少網民慨嘆新不如舊。其實又難怪大家感觸嘅，事關近日TVB重播星爺成名作《蓋世豪俠》，該劇成功開創無厘頭先河，成為大家嘅集體回憶，我哋仲搵到當年星爺嘅訪問，揭開拍《蓋》時種種不為人知的秘密。

參與創作發放笑彈

「坐低飲杯茶，食個包」、「你講嘢呀?」等金句，相隔30年到家陣都有人講，可見星爺所飾演的段飛有幾深入民心，原來當中不少爆笑情節，都是星爺與當時擔任編導的李力持所創，星爺笑言：「《蓋世豪俠》係我第一部擔正嘅電視劇，係好無厘頭，有好多唔知點解出現嘅笑料，係無原因嘅，總之就係咁。」果然夠無厘頭。

而要數當中嘅招牌笑彈，當然不得不提星爺練成「極樂神功」後，畀人一打就不斷「哎呀！哎呀！」之後就瞓喺地上嘅演出，原來星爺都係偷人師架：「我睇過一套粵語長片，唔記得咗個名，中咗人哋一拳，就哎呀！然後跪喺地，隔多兩秒再哎呀，一路哎呀幾十秒先暈，我覺得好適合，就套用落劇度。」

{{hket:inline-image name="gdg.jpg"}}{{/hket:inline-image}}

為結局孤注一擲

不過要數最驚天地泣鬼神，定非終極無厘頭大結局莫屬，劇情講述星爺同吳鎮宇展開生死鬥，星爺唔止穿上全藍色、心口有勇字的騎呢服飾，星爺打打吓唔夠打，食咗羅慧娟畀嘅神丹後，隨即竟表演賣廣告；又忽然間有小販因為佢打爛嘢，逼佢賠錢，總之愈打愈無厘頭。

如此劇情原來又是星爺構思，不過由於以當時來說，實在走得太前，有唔少人勸佢三思：「有好多人同我講星仔，如果套劇反應好，唔使搞到咁，萬一套劇反應差，觀眾只會更討厭你。雖然係有道理，但當時我乜嘢都無，要人認得我，只能行險招，我寧願畀人鬧到遺臭萬年，都好過做完之後無人有反應。」結果證實星爺搏贏咗，佢嘅大膽創意令《蓋世豪俠》成為永恆經典。

{{hket:inline-image name="tyt.jpg"}}{{/hket:inline-image}}