搵命搏圓夢 吳孟達：吊到缺氧

無綫播完《義不容情》後，將會於1月1號元旦夜播出周星馳同吳孟達嘅經典作《蓋世豪俠》，呢套劇唔止係大家嘅集體回憶，更令星爺同達哥組成黃金拍檔，於往後嘅日子在影壇發光發亮。可惜往事只能回味，隨住星爺淡出幕前，相信以後都好難有機會再一睹星爺同達哥一唱一和嘅風采。

不顧健康堅持圓夢

而無咗星爺喺身邊嘅達哥，雖然事業發展都叫OK，但卻不幸遇上病魔，於2014年因為病毒感染導致心臟衰竭，緊急入ICU，期間更多次傳出死訊，雖然最終達哥戰勝病魔，但體重卻暴跌廿幾磅，健康大不如前，被逼減產。不過早前達哥卻不顧身體接拍科幻電影《流浪地球》，全因為了圓夢：「我拍咗40幾年喜劇，從來未拍過科幻題材嘅戲，所以一定要拍。只係一切比想像更辛苦，要孭住40公斤重嘅裝備，每次吊威吔都吊到缺氧，一落嚟就要吸氧氣。」劇組因為擔心達哥安危，更安排白車於片場守候，幸好無發生意外，只是由於達哥幾乎每拍完一場戲，就要在場邊吸氧氣，以致拖慢拍攝進度，令他感到不好意思。

盼開拍《吳孟達》傳

而除了科幻夢，入行多年一直擔當綠葉配角的達哥，還有一個夢想，就是開拍自傳式電影《吳孟達》，一嘗主角滋味：「我一直好想拍呢部戲，希望喚醒觀衆對吳孟達嘅感覺，佢到底係一個點樣嘅人？我好想搵之前合作過嘅人參演，好似周星馳、劉德華，不過可能等到嗰時，我已經老人痴呆，乜都唔記得晒。」放心喎，吉人自有天相，況且下個月達哥先滿67歲，仲有大把日子。如果星爺同達哥可以故劍重逢，就肯定係粉絲之福。