每次見到晶哥王晶，佢都一定會帶畀大家無限驚喜，呢頭玩完余文樂嘅《冒險王衛斯理》，轉嗰頭又炮製陳浩民嘅《新六指琴魔》，真係睇到大家嘩嘩聲，不過相比晶哥今次嘅傑作，頭先嗰啲只係小兒科，事關佢套新戲《追龍之十億探長》近日於佛山開機，男主角係王浩信，女主角係徐冬冬，好戲之人鄭則士都有份參演，而據內地媒體指，出名鍾意炒冷飯嘅晶哥，今次套戲雖然聲稱係《追龍》番外篇，但實情係以劉德華嘅經典作《五億探長雷洛傳》做藍本，即係王浩信要接華仔棒做雷洛，呢個咁震撼嘅消息一出，大批網民即時贈興：「雷洛明明得五億，多咗個五億王生俾架？」「王浩信拍晶哥已經夠大鑊，仲要做啲咁經典角色，呢鋪真係fever咯」不過亦有網民話如果套戲奇跡地可以喺香港上映，一定會去支持，見識吓王浩信嘅雷洛有幾勁咁話喎！
網上圖片
網上截圖