啱啱過去嘅11月30號，就係《我和殭屍有個約會》播出20週年嘅大日子，呢套神劇堪稱亞視經典，去到續集更請來任達華飾演終極奸角將臣，大結局成功打破TVB一台獨大，取得六成收視，即係22點，都咪話唔誇張。而套劇除咗捧紅尹天照同萬綺雯，身為第二女主角嘅楊恭如，亦搶眼非常，當年風靡唔少宅男。
本來楊恭如星途似錦，可惜卻於2002年驚爆與上海富商周正毅發展婚外情，令清純形象一鋪清袋，其後只好轉戰內地主力拍劇，不過近年已甚少亮相幕前，但近期楊恭如忽然有新搞作，出名「雞仔聲」嘅佢勇闖樂壇推出單曲《學會愛》，希望透過歌曲向大家訴說自己的愛情觀，不過歌詞就有啲灰：「那些不切實際的浪漫，我們會厭倦，那些狂悲狂喜的聚散，和我們無關。」楊恭如仲將首歌放喺微博發售，只賣兩蚊人仔，不過到目前為止，只係遇上一位知音人，得一個人買咗，銷情都幾慘淡。
楊恭如唱歌已經夠爆，但更爆嘅係佢張唱片封套，明明只係得44歲，但唔知係P圖過火，抑或另有因由，佢個樣竟然變咗好多，難怪封套曝光後，惹來唔少網民質疑：「佢個鼻到底想點，好怪。」、「楊恭如明明好索架喎，點解搞成咁？」其實唔止封套出事，近日楊恭如於內地出席活動時，個樣都明顯變咗唔少，而且笑容仲有啲生硬添呀！
楊恭如微博
楊恭如微博
網上圖片