著名台灣導演鈕承澤性侵風波愈鬧愈大，他被指於家中侵犯電影《跑馬》的女工作人員，導致對方下體有多處撕裂，而鈕承澤亦於社交網站聲言會承擔責任，今日他一臉愁爆現身，當離開警署時，鈕承澤首度開腔回應事件：「在司法之外，有一場公審已經在進行了，我已經被判處死刑，鈕承澤已經死了。」
今次鈕承澤的性侵風波牽連甚廣，有指舒淇、張鈞甯之前亦曾經不幸中招，總之就係傳聞滿天飛！不過最新受害者竟然係任賢齊，大家唔好諗錯隔離，實情係鈕承澤執導嘅《跑馬》，男主角就係小齊，佢為咗呢部戲不惜放棄fit爆身形，體重由原來嘅74公斤，一日食足六餐，短短三個月內暴增至100公斤，即係220磅，令健康嚴重受損，唔止出現嚴重胃酸倒流，就連血糖同血脂都超標，搞到出名捱得嘅小齊都叫苦連天：「對住好食嘅嘢都冇晒興趣，見到都想喊，希望快啲拍完！」有指小齊之所以咁大犧牲，全因覺得《跑馬》劇本出色，隨時能為他帶來期待已久的影帝殊榮，事關原來小齊入行多年，音樂嘅獎就拎得多，相反電影方面就少之有少，最威只係憑《火龍》榮獲富川國際科幻電影節「最佳男主角」，金像、金馬都未攞過。
小齊犧牲咁大，點知電影就因為鈕承澤而被逼全面停工，工作人員更已全部被解散，據知，套戲至今只係拍咗大約三分之二，就算將來復工，一眾演員的檔期亦未必能遷就，意味小齊今次唔止分分鐘封帝無望，仲白肥一場！
網上圖片
網上圖片