離開無綫21年，張衞健主演的新劇《大帥哥》昨晚終於出街，旋即稱霸各大討論區，當中更一口氣推爆連登兩個posts，全城不斷翻炒佢嘅經典金句，唔少網民仲話當年佢套《西遊記》播出嗰陣，佢哋都未出世，估唔到呢位老餅哥一啲都唔老餅，不知幾貼地，有好多00後仲話要封健哥做偶像，一齊「型到噴汁」！
在網民眼中，大多TVB劇集都被冠以師奶劇稱號，劇情老套、多反駁又堅離地，強如台慶劇《是咁的．法官閣下》、《兄弟》都難逃網民口誅筆伐，不過張衞健的大帥哥竟然只用了一集，就成功洗脫以往TVB的悶爆方程式，贏盡各界讚賞。而張衞健的演出當然佔最大功勞，一開始他就花了不少花思在對白上：「各位，你哋係咪等咗我好耐？唔好意思，我嚟喇！」隔空回應一眾等到頸都長的劇迷。為了答謝大家支持，張衞健更大賣集體回憶，以招牌急口令講出昔日金句「型到跌渣」，又唱出他在《小寶與康熙》中韋小寶經常哼出的歌詞「涼風有信，秋月無邊。虧我思嬌情緒，好比度日如年，雖則我唔係玉樹臨風，瀟灑倜儻，但我有廣闊既胸襟，加強勁嘅臂彎。」之後張衞健與洪永城、徐榮及李嘉又玩埋廣東俚語歌：「命注定，運難卜，三衰六旺好難捉；仙灑脫，凡人俗，犯規和尚食狗肉；陽壽盡，落陰谷，生老病死乃定局」，令大家既懷念又驚喜。
而張衞健亦好清楚香港人要求「快」的心態，將TVB以往婆婆媽媽、講足成個禮拜都唔知做乜嘅方程式踢走，第一集已經節奏明快、內容豐富。先講革命黨員女主角蔡思貝假扮演奏樂隊，伺機刺殺張衞健，可惜被眾人識穿，張衞健竟放過她及其同黨。於是思貝決定順水推舟扮冧張衞健，結果健仔獸性大發把她抱起，用力拍打其臀部，再使出揸籮龍抓手；而思貝都不是省油的燈，馬上摸張衞健支槍回敬，打算再度刺殺他。他們的對手戲毫不留手，兼極具娛樂性，吸引很多網民激烈討論。最後思貝行兇失敗，張衞健又放過她，為日後思貝做佢老婆埋下伏線。
除了思貝隱瞞自己的真實身份，最估唔到連張衞健也不是真正的大帥，原來真大帥蔡國慶因為怕被人刺殺，於是讓雜兵張衞健假扮他入城，做炮灰。蔡國慶怒責張衞健放了革命黨，把他關到監牢，連同洪永城、徐榮囚禁起來準備處決。幸得李嘉及時營救，於是張衞等人偷偷逃獄，雖然張衞偉成功逃走，但思前想後，不想白做別人替身，所以回大帥府偷寶物，取回應得的東西。
如此多的內容在一集內全部發生，可見劇情有多緊湊，而張衞健作為重量級演員，勁有氣場由頭帶到尾，又故意學孫悟空的小動作，難怪獲一眾網民瘋狂好評。有人更揚言為了《大帥哥》日日煲劇，甚至力撐張衞健做視帝：「佢嘅演戲風格真係有一種唔識講嘅魅力」、「睇咗半集已經覺得係年度最佳劇集」、「我係00後，做《西遊記》嗰陣未都未出世，估唔到會有啲好戲嘅演員，我依家宣布健哥係我偶像」。而最誇張的是昨晚《大帥哥》播出短短半集後，已火速推爆連登兩個posts，破港劇最多一集一post的紀錄，總留言數量達2000，非常誇張。