近日Youtuber Alice喺尖沙咀舉行婚禮，一眾KOL好友都有出席，不過行禮之後就發生咗小插曲。話說前亞視歌手譚杏藍亦係來賓之一，鍾意分享扮靚心得嘅佢竟然一改平日風格，唔單止以面無血色嘅素顏亮相，仲身穿白衫、格仔褲、波鞋，成身「頹廢大媽look」去觀禮，相比其他賓客個個衣著得體，譚杏藍認真異相。而事後佢就喺instagram笑自己失策：「一到步發現位位都打扮得花技招展，全場衣香鬢影，經常穿錯衣著的我，再加上大素顏，就好像那年18，母校舞會，站著如嘍囉一般，連跟新娘獨照也不敢。」
不過佢呢個講法似乎說服唔到大家，仲引起大批網民喺佢instagram同各大討論區留言聲討，話佢唔尊重場合同一對新人：「去飲都可以著錯衫？連基本禮貌都唔識」、「就算普通event都有來賓影相環節啦，去自己event會唔會著成咁？」、「唔想去咪唔好去囉，你依家同直接踩場冇咩分別」連佢嘅粉絲都睇唔過眼，鬧爆譚杏藍今次為咗呃like搏出位所做嘅行為太過份。睇真啲幅相，對新人喺老遠背對住鏡頭，譚杏藍仲要特登blur咗對新人，認真過份。
其實又難怪網民咁激動嘅，事關今年28歲嘅譚杏藍一向走在時代尖端，細個曾經去美國留學，返港之後參加第一屆《亞洲星光大道》而入行，2009年簽約亞洲電視成為藝人兼歌手，2014年約約滿回復自由身後，譚杏藍就專心拍片，教人化妝扮靚，佢個Youtube頻道訂閱用戶數超過41萬，instagram嘅粉絲仲超過48萬，咁識打扮嘅KOL竟變成婚禮怪客，真係到底發生乜事呀？
4大婚禮衣著禁忌
去人哋婚禮除咗要諗比幾多人情之外，衣著上真係要小心啲。畢竟衣著就代表自己嘅態度，有心要祝福同恭喜一對新人，唔想失禮就應該做好自己，但又唔可以打扮得太靚，因住搶去主人家風頭，以下有幾點婚禮衣著禁忌大家要記住喇：
1. 唔好著白色裙，特別係喱士，因為新娘當日都會著住白色婚紗；紅色都要避免，因新娘都會著裙掛，有機會出現撞衫同爭風頭的場面。
2. 太暴露、性感都唔可以，婚禮係正式而莊嚴嘅場合，唔係你嘅個人show off時間，就算幾想show身材喺呢日都盡量收返埋啦！
3. 過份隨便係大忌，特別牛記笠記頹look，雖然主人家口講唔介意，但如果有得揀，都會想大家著得靚靚咁祝賀，一齊影返張大合照做紀念嘅。
4. 唔好著全黑，因為中國人覺得全黑係去白事先會咁著，會為主人家帶來霉氣，所以都係可免則免。