「是緣是債是場夢，夢迷夢醒都心痛」呢首歌不單是劉錫明的代表作，簡直是他的人生寫照，好似成世人都爭人債！1988年劉錫明參加TVB藝員訓練班，同期仲有郭富城、林家棟，但他獲高層賞識，翌年已有份參與重頭劇《義不容情》，飾演關海山兒子、劉嘉玲細佬，這位富二代最終慘被溫兆倫開車撞死，雖然戲份不多，但已成功嶄露頭角，難怪去到1990年劉錫明已擔正做台慶劇《烏金血劍》男主角，本來係開心事，弊在女主角係周慧敏，當時劉錫明只係講咗一句：「我欣賞周慧敏！」竟然觸動了當時周慧敏男友倪震嘅神經，佢用旗下雜誌《Yes!》不斷唱衰劉錫明，仲封佢做「毒瘤明」，令呢位明日之星從此變成過街老鼠。
轉戰內地 生活淒涼
其後劉錫明被逼轉戰內地，點知「毒瘤明」呢個朵誇到連內地人都識，令他的工作量寥寥可數。早年定居北京的他，被內地記者發現居於品流複雜的疑似紅燈區，幾乎每日都係食餅乾同麵包，就連幫襯街邊小販都要講價，而當記者上前採訪，劉錫明更大方承認財困：「我每月大約賺數千至兩萬，但養家都要一萬，希望你們的採訪能幫我漲點人氣。」可見當時他的生活有幾淒慘。
幸而經過多年努力，劉錫明近年總算捱出頭來，有份參演《錦繡未央》、《東方戰場》、《新天龍八部》等電視劇，雖然只是配角，但加上商演、登台等工作，總算生活無憂，已成家立室的他，更自誇老婆張齊玲靚過周慧敏。而有關劉錫明工作的宣傳海報更不時於網上出現，只見54歲的他依然英氣十足，絕對係寶刀未老，不過海報就梗係P過架啦！近日於微博就發現劉錫明的近照，只見他發福不少，仲有大肚腩，雖然幸福肥係開心事，但話晒都仲要搵食，唔少網民都叫明哥係時候keep keep佢，快啲變返海報個look喎！
網上圖片
網上圖片