「巨聲幫」出身的許廷鏗，唱得又睇得，一出道就有「港版吳尊」美譽，深得TVB與星夢力捧，但他突然於去年走出舒適區選擇離巢，隨之而來竟然是封殺風波，有指他步林峯後塵登上「不受歡迎名單」，全面絕跡TVB，由於當時他與新公司華納尚有合同細節未傾妥，可謂前途未卜，本身是牙醫的他更被發現經常返回診所工作，令外界一度擔心他會退出娛樂圈。幸而最終一切雨過天青，Alfred於華納從新上路，雖然無緣競爭去年的勁歌金曲頒獎禮，但就成功憑《神奇之旅》榮獲「叱咤十大」歌曲獎第2 位，Alfred更一度激動得流下男兒淚，以行動證明封殺又有乜嘢可怕？
與過去告別 勇闖紅館
對於當日因為離巢鬧出連串是非，Alfred半點後悔都沒有：「入行六、七年都係同一間公司，我想畀時間同空間自己諗吓未來方向點做。」而踏入2018年，Alfred依然keep住氣勢，繼喺麥花臣開騷後，又將於明日推出同名專輯《許廷鏗》，今次大碟拍攝概念更來自Alfred本人，喻意跟過去告別：「裡面有好多我對住鏡嘅相，有一張仲係喺被打爛嘅鏡前面同自己對戲，我係想話畀大家聽我要檢示自己、同舊嘅我告別。」
許廷鏗真係講得出做得到架，之前佢因為身形發福，被網民嘲笑同「亞洲神童」張如城撞樣，好彩經過多番努力，港版吳尊返嚟喇！而深知自己外型煞食深得姐姐們歡心嘅Alfred，仲透露已經努力操肌，事關明年3月佢有一個重要任務：「公司終於申請到紅館檔期，一切感覺好夢幻，我會奮不顧身地做好演唱會，而且操肌嘅情況比預期好，至於係咪要騷，就要睇大家意願喇！」
許廷鏗IG