近年娛樂圈湧現一批又一批星二代，最新加入嘅就係莫少聰同洪欣嘅兒子張鎬濂，你無睇錯，佢雖然係莫少聰個仔，但就唔係姓莫而係姓張，事關當年洪欣為莫少聰未婚產子，但兩人分手後，女方指責男方未有照顧兒子，更禁絕父子來往，雙方爆發罵戰，其後洪欣嫁予內地藝人張丹峰，個仔就由原名莫鎬廉改為張浩鋒，但之後又再改名張鎬濂，係咪好複雜呢？
張鎬濂今年只係得17歲，已經有183cm高，而據內地媒體爆料，最近佢已經簽約樂華影視公司，成為范冰冰細佬范丞丞的師弟，而佢將會以男團身份出道，頭炮就係參與內地人氣節目《偶像練習生2》。阿爸係莫少聰、阿媽係洪欣、繼父係張丹峰，張鎬濂本身已經好有優勢，但有指有關方面覺得仲未夠，早前安排佢去韓國接受秘密訓練，話明係秘密，外界當然唔知佢實際做咗啲乜啦！不過近日佢終於返回內地準備出道事宜，喺最新曝光嘅照片所見，張鎬濂成個look都唔同晒，驟眼睇成個韓星Oppa咁款，而最搞笑嘅係有網民叫大家唔好多心：「他應該只是去韓國轉換髮型！」估唔到內地網民又幾有幽默感喎！
網上圖片
網上圖片