要數圈中模範夫妻，趙雅芝與黃錦燊肯定上榜，事關兩人結婚34年，依然成日十指緊扣四圍去，仲不時喺網上放閃，最近趙雅芝64歲生日，黃錦燊就為太太送上驚喜，又花又蛋糕，睇見佢哋笑得咁甜，就知有幾sweet啦！
其實兩人結婚之初，外界都對呢段婚姻有保留，事關80年代社會風氣相對保守，而趙雅芝之前唔止結過婚，仲有兩個仔，正所謂後父唔易做，但佢哋結婚多年竟然可以零是非緋聞，難怪唔少人都想知佢哋到底有乜嘢愛情保鮮法？依家有請趙雅芝解開箇中謎團：「我真係唔覺原來已經結咗婚咁耐，佢係一個我好愛嘅人、永遠都係我男朋友，無論相處幾耐都好，佢為我做嘅任何一樣嘢，我都會抱住感謝嘅心，唔會覺得係理所應當。而且我嘅想法好簡單，畢業之後工作，然後就係拍拖結婚生仔，咁就係幸福。」
趙雅芝微博
趙雅芝微博
為家庭放棄事業 分享不老秘密
為追求幸福，趙雅芝於事業如日中天之際，選擇息影全心照顧家庭：「如果因為工作，唔能夠睇住小朋友成長，我會一生遺憾，當時小朋友嘅學業好緊張，我無可能工作，一定要睇住佢哋啲功課。」幸而隨著小朋友長大，趙雅芝近年再度活躍幕前，其微博更足足有成千萬粉絲，可見美魔女喺內地幾有市場，而對於被外界封為無瑕美魔女，佢就好謙咁話其實化妝品都幫到唔少，咁到底趙雅芝的不老秘密是甚麼：「我平時會用洗完米嘅水洗面，好有美容效果！而我覺得做人一定要樂觀，要有好嘅心態，呢個亦係保養秘訣。當然唔少得作息要有規律，我唔會畀自己太夜瞓，要有充足睡眠；飲食方面通常每餐只吃七、八成飽，少食多餐，多吃新鮮的果蔬。」姊妹們想做美魔女就要好好跟住學喇！