每逢年尾，又係樂壇派成績表嘅時間，不過自從多咗好多內地搞嘅乜乜頒獎禮之後，真係睇到大家眼花繚亂，導致獎項含金量大跌，好似嚟緊舉行嘅2018全球華語金曲獎，之前明明話喺香港搞，但轉個頭又變咗喺澳門舉行，真係兒戲到震！今次頒獎禮將會頒發「傑出年青歌手／偶像」、「殿堂歌手」與「百年巨星紀念大獎」等殊榮，而叫得做「全球」，意味會有好多唔同國家、地區代表參與，當中人氣最勁嘅當然係內地大熱作《延禧攻略》嘅團隊，包括獻唱《相忘》嘅蘇青、《雪落下的聲音》嘅陸虎等，台灣代表有金曲歌后艾怡良，馬來西亞則是有鬼才之稱嘅黃明志。
睇落名單算唔錯，不過如果睇埋香港代表，絕對會嚇大家一跳，雖然有葉振棠、葉麗儀等唱得之人助陣，但估唔到Purple姐姐李紫昕都有份，大會為隆重其事，仲幫佢影咗張靚靚海報，雖然Purple姐姐當年被喻為「兒歌天后」，不過同「全球華語金曲」幾隻字真係大纜都扯唔埋，難怪惹嚟唔少網民贈興，「唔怪得啲人話香港樂壇已死，Purple姐姐都可以玩全球華語金曲」、「我淨係記得佢工人瞓廁所，乜佢仲喺娛樂圈咩？」
廁所風波最經典
點解無端端關廁所事？事關2012年Purple姐姐接受傳媒訪問，帶記者參觀其1800呎豪宅，雖然間屋超大，但佢竟然要工人瞓廁所，於坐廁之上加建床位，令工人與馬桶同眠，報道一出，惹嚟外界炮轟其行徑完全不符「兒歌天后」形象，導致事業大插水，至今仍無復當年勇。