貴為「宇宙G.E.M.」,鄧紫棋做乜都快人一步,繼登陸NASA獻唱後,由於之前版本的新歌MV《那一夜》效果未如理想,阿G.E.M.決定嚟招自導自演,第一次擔任MV導演,兼拉大隊到台灣拍攝,由於今次主題是瘋人院,所以阿G.E.M.毫不錫身,穿上白色病人服,一時瘋狂拆爛鐵絲網企圖自殘,一時踎地露出詭異笑容,真係睇到人不寒而慄,難怪阿G.E.M.都話:「其實呢個癲癲喪喪嘅我,係想表達為咗愛可以有幾瘋狂,所謂嘅癲係世界所有人都唔明白你諗乜。」
而阿G.E.M.更於IG展示大作,並繼續留言吐苦水:「在一星期裡從零開始構思故事,每天晚上的通宵商量、飛機上不理旁人目光地爭取時間練習演一個瘋子,如果被空姐看到一定以為我是瘋的。」而令人驚喜的是,阿G.E.M.更獲內地頒發「跨界創新人物大獎」,認真厲害。雖然獲得獎項鼓勵,不過網民就似乎唔係咁buy喇,紛紛留言贈興:「梗係做得好啦,做返自己嘛,宇宙G.E.M.以後要改名『宇宙癲』!」「拍個MV,使唔使搞到做癲婆咁盡呀,為配合主題,唔知今次首歌又要X叫幾多次呢?」