一直被譽為香港視帝視后前哨戰的星馬視帝視后大戰，雖然今年TVB取消了星馬當地的頒獎禮，但就將獎項搬返香港，仲會喺11月19號台慶當晚頒發大獎，令獎項更具意義。
而近日TVB於官方微博公布馬來西亞賽區視帝視后的最新戰況，「最喜愛TVB女主角」三甲是黃智雯《三個女人一個「因」》、李佳芯《BB來了》與及陳煒《宮心計2深宮計》，由於她們都是熱門人馬，故爭議不大，相反「最喜愛TVB男主角」的名單就於網上掀起造假風波，事關王浩信套《兄弟》都未播，竟然入圍三甲，而陳展鵬的《天命》平均收視只有21.54點、袁偉豪的《棟仁的時光》平均收視亦只得22.25點，三甲就係三甲喇，不過係收視包尾三甲！相反之前大獲好評的陳家樂《逆緣》與及近期大熱的馬德鐘《跳躍生命線》，竟然無緣入圍三甲。
炮轟三甲 救救馬神
難怪自名單公布後，從馬來西亞到香港以至內地的多個討論區，各地網民紛紛提出質疑，係咪親生仔大晒？當中更重點炮轟王浩信：「《兄弟》都未播，咩玩法？大家又知佢做得好？咁搞法仲邊有公信力呀？」「照咁睇今年都係王浩信玩晒架喇！佢根本唔使拍劇都贏呀，吹咩！」亦有人笑指陳展鵬與袁偉豪套劇收視屢破新低，若然他們榮登視帝，應該係史上最低收視的視帝。
網民除了鬧爆三甲，好多人亦戥馬德鐘唔抵：「馬德鐘在《跳躍生命線》的演出，大家有目共睹，竟然三甲不入，會否造得太過份？」而根據資料，今次馬來西亞賽區的玩法好簡單，只需登記email就可以投票，即係就算你是香港人抑或內地人一樣玩得，所以就有人發起救救馬神行動，一齊去投馬神一票，睇吓能否力挽狂瀾。