萬眾期待，劉德華的紅館跨年騷將於下個月舉行，20場演唱會、合共六萬張門票半日賣晒，結果當然又成為黃牛嘅黃金機會，網上更出現大量天價炒飛，當中有頭排靚位竟然索價近四萬蚊，較原價980蚊，足足炒貴超過39倍，簡直人神共憤。雖然演唱會飛大賣，對華仔嚟講係開心事，不過就因為咁爭落周身飛債，最近校長譚詠麟仲喺微博同facebook出post，講到自己偶遇華仔，竟然要嚟招「壁咚」搶飛，仲配晒設計對白，見d相校長講到七情上面，真係爆笑度十足。
對白竟然交代連校長都要食檸檬，可見華仔啲飛有幾搶手，而唔少網民仲大讚校長講出自己嘅心聲：「我都想學校長搶飛呀，我唔貪心，兩張就夠。」「華仔咁大膽竟然托校長手踭，真係要打屁股呀！」亦有網民大讚估唔到校長咁有喜劇天份：「佢配啲對白真係好正，睇到我笑咗出嚟，希望佢快啲撞埋學友、leon、城城啦！」